VOV4.M’nông- Pah kan tay ta rơh hăn kan ăp n’gor Nam Trung Bộ, ôi nar 27/7, kruanh Quốc hội Vương Đình Huệ n’hanh mpôl pah kan lĕ pah kan đah rnâng kan n’gor Ủy Quảng Nam. Kruanh Quốc hội Vương Đình Huệ rnê, bâh du n’gor kan tuch tăm, Quảng Nam lĕ hao jêng du n’gor râng geh mhơm ngăn tâm nkaul, nău geh n’gâng kan wăng sa ăp nar lơ ma pơk hvi, lah ngoăy tâm 16 n’gor nkuăl ƀon têh geh nău dơi mpeh tơm prăk trung ương n’hanh lah du n’gor ta lam dak geh nkual wăng sa pơk, nkual wăng sa dăch dak lêng n’hanh nkual wăng sa mpông n’har bri.

Nău kan mât rnă njrăng rêh jêng, nău rêh jêng geh mât đăp mpăn, ngăn lah rnôk rnoh nuĭh dơi kơl, nuĭh geh kan đah rơh kăl e geh tât rlău 23% rnoh nuĭh lam n’gor. Tâm let năp tay, kruanh Quốc hội Vương Đình Huệ dăn đă, n’gor geh uanh nđôi tay ăp bôk nău kan pah kan ƀư tĭng ăp Nghị quyết bôk nău kan bâh Trung ương, bâh n’gor, rdâk njêng trong kan na nê̆ gay ma ƀư tĭng, njêng nău kan tâm hun hao pâl nđaih, ndâk nsơm pâl nđaih lôch nuh srê, ntŭk gŭ rêh, nău tăch rgâl, ntil ndơ pâl nđaih an geh nău têh hao mhe, ntrôl dăng pe bôk nău kan nkô̆ mpŏng ngih dak.

Nuĭh rblang: Thị Đoắt