VOV4.M'nông: Pơh bah năp nơh,, HĐND n'gor Lâm Đồng hŏ ƀư rơh hop n'gul năm, gay tâm nchră luh ăp trong nkra bah rbăn lhơ, mpăng đêt, ntrŭt ntrôl hun hao wăng sa- rêh jêng kon nuĭh 6 khay kêng dŭt năm 2022. Tâm nê, n'gor an ƀư tay geh nău tam bôk nău kan gưl neh dak mpeh rdâk njêng ƀon lan mhe, hŭch ach o jŏ jong, nkre đah bôk nău kan hun hao nkual ƀon lan rnoi mpôl đê̆ n'hanh mpeh yôk yang, lơn lah nău mât, an ƀư ntuh kơl geh nău tam ăp tơm prăk dơi Quốc hội, Chính phủ tâm pă.

Tĭng nău mbơh ta rơh hop tâl  6 HĐND n'gor Lâm Đồng (khóa X), 6 khay bôk năm 2022, hun hao wăng sa- rêh jêng kon nuĭh bah n'gor geh âk nău dơi nkah uĕh. Tâm nê, dŭt ntoh lư lah wăng sa hun hao 9,29%; sŏk  geh ngân sách ngih dak tât 7.800 rmen prăk, dah 71,5% trong nchrăp ta n'gor n'hanh hao rlău 22% rđĭl đah ndrel khay dja năm  e nơh. Lĕ rngôch nsĭt geh tăch n'gluh rlău 436 rkeh USD, hao 43%; n'hanh năch pâl nđaih geh rlău 3,7 rkeh tơ̆, hao 86,5% rđĭl đah ndrel khay dja năm 2021. Ăp trong kan đăp mpăn rêh jêng kon nuĭh, n'hŭch ach o, rnă njrăng chính trị n'hanh đăp mpăn lam rêh jêng kon nuĭh dơi mât uĕh.

Bah meng ăp nău dơi hŏ geh, Lâm Đồng hôm tâm rdâng đah âk jêr jŏt, rbăn lhơ đŏng, lơn lah đah pah kan mât njrăng bri, mât dŏng ndơ mpêt khlay, loih kông, neh ntu, dăp rgum....Lah ta rnôk ntơm pơk rơh hop, wa Trần Đức Quận, Ủy viên Ban chấp hành Trung ương Đảng, Bí thư Tỉnh ủy, Kruanh HĐND n'gor Lâm Đồng an lah, aơ lah kô̆ yơn kol ân dơi rgum tâm nchră, rblang năl, joi ăp trong nkra gay mbluh soih aih, ntrŭt ntrôl hun hao wăng sa- rêh jêng kon nuĭh. Wa Trần Đức Quận, lah:

Ta rơh hop dja, ăp đại biểu HĐND n'gor rgum gŭ mĭn na nê̆ tĭng nkô̆, tâm nchră, rblang kloh, nchŏng luh nkô̆ gay dơi tât tâm ban kơt ăp nău nchiăng khan, rbăn lhơ, gay ăp trong nkra mbluh soih ăp nkô̆ yơn kol khan tâm rnôk hun hao wăng sa- rêh jêng kon nuĭh, đăp mpăn rnă njrăng chính trị n'hanh đăp mpăn lam rêh jêng kon nuĭh ta n'gor".

Ta rơh ôp n'hanh ơh nău ôp, kruanh rđău kan n'gor Lâm Đồng lah rjăp tă bah mƀơk lhoi mât uănh neh rong an ƀư trong hŏ têk nkre đah ăp nău tât khuch an tay bah kơi. Tâm nê, nkual ƀon têh Bảo Lộc n'hanh nkuâl Bảo Lâm dơi uănh lah ăp ntŭk duh hô an geh nău rong neh ƀư trong, lôch nê tâm pă blah neh ta n'gor Lâm Đồng. Tĭng nchih rgum mô hŏ ăp tŏng bah nhih pah kan dơi kan, geh dŭt đêt rlău 50ha neh bah bơi 200 nuĭh hŏ dơi rong neh an ngih dak, tâm nê geh nuĭh rong đah rnoh hvi hao tât 10ha. Nău dŭt nkoch, lôch rong neh an Ngih dak, nuĭh ƀon lan pơk êng trong hăn, tuh bê tông dak chai n'hanh nthoi đah ăp trong me êng ƀa ƀă tâm nkual.

Wa Trần Văn Hiệp, Kruanh UBND n'gor Lâm Đồng an lah, nău nuĭh ƀon lan an rong neh ƀư trong lơn âk geh ma joi geh an săk nơm gay tŏng nău dơi tăch blah neh tĭng quy định. Lơn âk ăp nkuâl, nkual ƀon têh mô ƀư si ƀŭt gay dơn, mât rnoh neh hŏ dơi rong an, tâm rnôk ăp rnoh neh dja lôch geh n'glêh an sŏk mplơ̆ tay hŏ sĭt mpeh nău dơi mât dŏng bah ngih dak. Gay nuĭh ƀon lan, ăp rnăk, ăp nuĭh tĭng ƀư nău kan pơk trong mô đăp mpăn dăp rgum n'hanh quy định bah pháp luật. Têk nkre đah nău tăch luh blah neh jêng ăp nkual ƀon lan gŭ ntoh êng lôch nê pla tăch.  Wa Trần Văn Hiệp, lah:

“Nô nău rong neh ƀư trong mhe i ngăn lah jêng ăp nkual, ăp ntŭk ƀon lan gŭ mhe gay nkơnh n'hơ. UBND nkuâl Bảo Lâm, nkual ƀon têh Bảo Lộc an ăp  rnăk, ăp nuĭh rgâl dŏng neh tuch tăm jêng neh gŭ ma mô  hŏ đăp mpăn dơi ăp dăp rgum êng ƀa ƀă geh tât. Jêng tât ntoh âk nkô̆ nău tâm pah kan mât uănh dăp rgum neh ntu, rdâk njêng ta ntŭk, ƀư nuih ăl tâm nău lư n'hanh khuch tât nsing nơm, rup gui bah n'gor Lâm Đồng. N'gor hŏ geh si ƀŭt rđău đă ăp n'gâng kan, ăp ntŭk tĭng ƀư di nkô̆ geh tât tăch blah neh mhe dơi an dŏng tâm bôk khay 7. Đăp mpăn yor ma nău dơi geh nuĭh ƀon lan,, doanh nghiệp yơn nkre ân đăp mpăn nău way ndơ̆ prăk kaih an Ngih dak".

Nsing kalơ uănh năl lôch jêh geh tĭng ƀư nău kan hun hao wăng sa- rêh jêng kon nuĭh 6 khay bôk năm 2022 n'hanh nchroh nô nău tâm let năp tay; HĐND n'gor Lâm Đồng hŏ tâm ban ŭch mpeh trong nkra tĭng ƀư nău kan hun hao wăng sa- rêh jêng kon nuĭh 6 khay kêng dŭt năm 2022 đah nău nsrôih lôch jêh rlău ăp rnoh tât ndơ̆ luh ma UBND n'gor hŏ ntrŏng năl; nkre, lah rjăp ăp rmôt nkra khlay ân rgum tĭng ƀư tâm let năp tay kơt: Ôp uănh tay ăp tŏng lam lĕ rngôch, uănh năl na nê̆ ăp rnoh tât kan, nău dơn kan tĭng nghị quyết bah Tỉnh ủy n'hanh HĐND n'gor mpeh hun hao wăng sa- rêh jêng kon nuĭh, đăp mpăn njrăng n'gang neh dak- rnă njrăng năm 2022; nkre, groi nđôi n'hanh geh trong tor lor ăp khay, ăp quý gay tĭng ƀư geh nău tam ăp nghị quyết bah Quốc hội, bah Chính phủ mpeh ăp trong nkra tơm rđău đă mpeh mât bôk kan tĭng ƀư trong nchrăp hun hao wăng sa- rêh jêng kon nuĭh n'hanh trong nchrăp sŏk dŏng prăk ngân sách ngih dak năm 2022. Lor ơm nchrăp rdâk njêng hun hao wăng sa- rêh jêng kon nuĭh n'hanh trong nchrăp sŏk dŏng prăk ngân sách năm 2023; trong nchrăp ntuh kơl ngih dak năm 2023. An ƀư tay geh nău tam bôk nău kan rnoh ŭch tât kan ngih dak mpeh rdâk njêng ƀon lan mhe, n'hŭch ach o nâp dăng, nkre đah bôk nău kan hun hao nkual ƀon lan rnoi mpôl đê̆ n'hanh mpeh yôk yang, lơn lah nău mât dŏng, an ƀư ntuh kơl geh nău tam ăp tơm prăk mhe dơi Quốc hội, Chính phủ tâm pă./.

Nuĭh rblang: Điểu Thân