Ta xă Đam Rông 1, n’gor Lâm Đồng, nô Phạm Văn Hội lah ngoăy tâm âk nuĭh kan lŏ mir hăn lor ndơ̆ grăp mắc ca an nkret njêng jru. Bah nău tăch grăp rih knơm tâm nuĭh rwăt, nô janh ntuh kơl măy plôk ntô, ndơ pâr n’hanh ndâk njêng ndơ moh êng “Mắc ca Hội Dung”. Ndơ grăp mắc ca pâr bah ntŭk kan geh OCOP 3 sao, nkre tâm rgop rwăt ndơ bah âk rnăk tâm nkual gay nkrêt njêng, tăch ta ăp ntŭk tăch têh kơt Hà Nội n’hanh TP.HCM. Tĭng nô Hội, ŭch ndơ hăn ngai ri an uănh nđôi uĕh kah ntơm tă bah mir tât nuĭh dŏng.

Nkret njêng jru an mĭn bah rnôk ma tă bah mir an tât nău ƀư n’glêh dŭt luh tât nuĭh dŏng. Nău geh khlay bah mpôl oh lah uĕh kah hăn lor bôk năp gay hăn jru, hăn ngai.

Bah ntrong ƀư bah nô Hội, nkret njêng jru dôl jêng trong hăn dơi âk doanh nghiệp, kan ndrel n’hanh ntŭk nkra njêng ta Lâm Đồng săch gay n’hao khlay ndơ lŏ mir. Aƀaơ lam n’gor geh rlău 500 ntŭk nkret njêng, tâl dŭng đah dĭng lĕ geh rlău 1,53 rkeh tấn du năm, geh n’gâng tơm gay ndơ lŏ mir ta ntŭk tâm di nău ŭch bah trong tâm pă mhe n’hanh pơk hvi ntŭk tăch n’gluh.

Tĭng yuh Nguyễn Thị Thùy Minh, du hê nuĭh tơm nkret njêng ndơ lŏ mir ta phường Lâm Viên-Đà Lạt, nkret njêng jru dôl pơk luh trong hăn nâp nâl an ndơ lŏ mir ta ntŭk. Mô knŭng mkra nău rmeh ndơ lŏ mir tâm yan pĕ lêh, nău ƀư nkret njêng hôm kơl khlay ndơ, jŏ jong nar mât prăp, ntop tay nău kan an nuĭh kan ta ntŭk n’hanh ntrŭt ntrôl jêng trong tâm rgop bah nkra njêng tât tăch.

Lăp yan pĕ lêh ri geh âk ndơ lŏ mir jêng he tăch mô ngăch. Yor rĭ rnoh ndơ nĕ pơng mbra djơh. Yor nê ntŭk mpôl hên săch công nghệ pâr kro aơ gay he dŏng geh jong nar lơn ma ndơ âk ntil lơn, kah lơn.

N’hêl na nê̆ an saơ, ndrel du ntil ndơ yơn rnôk dơi nkret njêng dơi hao âk rnoh khlay ntŭk tăch, nkre kơl nuĭh nkra njêng nchrăp lơn lỏf bah năp ăp nău ndal bah ntŭk tăch. Gay geh trong hăn mhe an nău kan nkret njêng ndơ lŏ mir, n’gor Lâm Đồng lĕ an trong nchrăp hun hao nkret njêng biăp play lvang 2026-2030. Nău rƀŏng tât năm 2030, rnoh biăp play nkret njêng jru geh nklăp 30% dĭng lĕ rnoh ndơ, ntơm ndơ̆ công nghiệp nkret njêng jêng n’hao soan hao jêng khlay bah wăng sa lŏ mir ta ntŭk.

Tĭng wa Phan Nguyễn Hoàng Tân, Giám đốc N’gâng kan tuch tăm n’hanh ntŭk ntô gŭ âm n’gor Lâm Đồng, nkret njêng jru mpông pơk n’hao rnoh khlay hao, n’hao soan tâm rlong n’hanh pơk hvi ntŭk tăch n’gluh an ndơ lŏ mir ta ntŭk. Wa Phan Nguyễn Hoàng Tân lah rjăp:

Gay n’hao rnoh khlay tâm rlong bah nău kan kơt hun hao ntŭk tăch, lơn lah tăch n’gluh he an mĭn ăp nkual way tăm, nkra njêng an hăn ndrel tâm di uĕh. Nkre ndrel đah nĕ n’hao rnoh nkret njêng tâm nău kan lŏ mir gay geh nău khlay hao n’hanh n’hao dơi tâm rlong bah nău kan.

Bah ăp ntŭk nkra njêng têh rnăk wâl ăp doanh nghiệp ntuh kơl trong way ƀư mhe, nkret njêng jru dôl jêng nău rgâl têh tâm nău mĭn hun hao lŏ mir ta Lâm Đồng. Du ndơ lŏ mir jêh nkret njêng mô knŭng rgop n’hao nău geh an nuĭh ƀon lan, n’hŭch hoach jêh pĕ lêh ma hôm n’hao soan tâm rlong, pơk hvi ntŭk tăch. Aơ lah trong hăn khlay gay ndơ lŏ mir Lâm Đồng hao khlay n’hanh hun hao nâp nâl.