Lâm Đồng-Ban giao hưởng Xanh lah nău mbơh tơm ta Rƀŭn nchră ăp trong mkra hun hao pâl nđaih lvang 2026-2030, uănh tât năm 2040, yor UBND n’gor Lâm Đồng ƀư lơ 25/8 ta Đà Lạt. Ăp đại biểu năl lah, jêh nglăp nsum, Lâm Đồng geh ntŭk ntô hun hao pâl nđaih têh hvi, âk ntil lơn, đah nău geh mpeh bri dak n’hanh dơi boăt nthoi nkual.

Yơn lah, n’gor an rgâl mhe nău mĭn mât uănh ntŭk tât, mkra nău ndơ mô tŏng êng, n’hao boăt nthoi đah ăp trong, nău rhŏ; mât uĕh nău geh pâl nđaih dak lêng, neh ntu, mât chăm săk soan n’hanh wăng sa măng. UBND n’gor Lâm Đồng mĭn lah, pâl nđaih an dơi hun hao tâm ntŭk ntô tâm ban ŭch, geh nău khlay hao âk lơn, tâm di đah hun hao wăng sa đah mât ndrăy bri dak, ntŭk ntô, văn hóa n’hanh n’hao nău rêh nsum mpôl. Lâm Đồng nchrŏng trong hun hao pâl nđaih kloh ueh, nâp nâl, ueh nâp âk, mât na nao nău geh “Bri krŏng yôk prêh-Dak lêng-Neh ntu trôm pư̆.