Rƀŭn nchră yor 6 ntŭk geh ăp phường Xuân Hương-Đà Lạt, Lâm Viên-Đà Lạt, Xuân Trường-Đà Lạt, Cam Ly-Đà lạt, Lang Biang-Đà Lạt n’hanh xă Lạc Dương tâm rgop ƀư, gay nkoch mbơh nău geh, ntil ndơ nău nchrăp ƀư n’hanh djăt nău rgop bah doanh nghiệp, nuĭh ntuh kơl.

Đah ding lĕ rnoh neh rlău 1.500 km2 enoh nuĭh rlău 314.000 nuĭh, ndrel geh tâm ntŭk sinh thái Đà Lạt-Lạc Dương, 6 ntŭk geh trôk nar tâm ban, rnoh prêh nklăp 1.500m, dơh hun hao pâl nđaih rlu rlău, lŏ mir công nghệ mhe, nkual sinh thái n’hanh nău rhŏ ueh âk.

Âk nău nchrăp ƀư dôl dơi kuăl jă ntuh kơl tâm ăp ntil nău nkual têh, tăch rgâl, pâl nđaih, ntung trong. Yơn lah, doanh nghiệp an lah du đêt wăk kol jŏ jong an ơm dơi rơih jăng. Wa Lê Văn Cường, Giám đốc Công ty TNHH Đà Lạt GAP nkoch nău wăk kol n’hêl na nê̆ mpeh neh ntu:“Mpôl hên dôl geh kol lah neh ri geh yơn ma êh nĕ bah dih lâm nghiệp mô geh an kơp dơn samƀŭt dŏng neh. Yor ri rnôk mpôl hên ƀư mã nkual kol đŏng, n’hanh mpôl hên ŭch prăk gay manh ngân hàng ri ngân hàng đă an geh drăp ndơ, geh sổ chăng”.

Nkual 5 phường Đà Lạt n’hanh xă lạc Dương dơi uănh lah hôm e rmeh, ntŭk ntô hun hao têh yơn nău geh mô dơi ƀư tâm di. Bah ăp wăk kol doanh nghiệp nkoch, Groi Kruanh UBND n’gor Lâm Đồng Nguyễn Hồng Hải đă ăp ntŭk n’hanh n’gâng kan, nău kan an nchră kloh lơn lor rnôk ndơ̆ an nău nchrăp ƀư hăn kuăl jă, kơp uănh dăp rgum, pháp lý, nău ngăn neh ntu, lôch jêh samƀŭt n’hanh nău dơi ƀư, dêr nău wăch rgum nuĭh ntuh kơl jêh nĕ mư dôih rklaih wăk kol: “Gâp đă kruanh 5 phường n’hanh xă Lạc Dương kơt kruanh ăp n’gâng kan, nău kan an kơp uănh tay dăp rgum nkual têh. Tâm trôm nĕ geh tâm di nău đă bah nuĭh ntuh kơl đŏng lah mô? Nsrôih ƀư an rjăp gay mô geh nău ma nău nchrăp ƀư jêh rnôk lĕ wăch rgum hôm, nuĭh ntuh kơl mbơh ƀư jêh nĕ lŏ geh nău rmôt kan dôh rklaih jêr jŏt, wăk kol an nău nchrăp ƀư”.

Jêh rƀŭn nchră, kruanh n’gor Lâm Đồng đă ăp ntŭk rgum, tâm pă tĭng nău đă bah doanh nghiệp, năl kloh lĕ đah nău kan mkra n’hanh uănh nđôi gay rnôk geh săk rnglăy. N’gor Lâm Đồng ton hăn ndrel, dôh rklaih jêr jŏt tĭng nău ntrŭnh pháp luật, geh ntŭk dơh gay ăp nău nchrăp ƀư dơi mbơh ƀư ngăn ngên, săk rnglăy.