Tâm mông nar khuh n’gôr mbah rhơn Cách mạng Khay pham n’hanh Quốc khánh 2/9, ôi (20/08), ta ntŭk rgum tâm nchră gưl neh dak, Lễ nkah ndray 80 năm nar njêng Chính phủ (28/8/1945 - 28/8/2025) dơi ƀư rgum. Nkah tay nău kăl e, Thủ tướng Chính phủ Phạm Minh Chính lah kloh: Nar 28/8/1945, Chính phủ lâm thời dak Việt Nam Dân chủ Cộng hoà hŏ n’gluh nău mbơh bah năp ƀon lan lam dak tâm ban kơt lam ntŭr neh mpeh nău njêng Chính phủ mhe n’hanh mbơh săk 15 nuĭh tă bah Kruanh Hồ Chí Minh ƀư Kruanh, ntơm njêng luh bah Chính phủ Cách mạng bôk năp tâm du njăr trong jong rbăn năm rdâk njêng neh dak n’hanh mât njrăng neh dak bah rnoi nuĭh he.

Tâm 80 năm ndrong, rlău âk rơh jêr jŏt, krit nji n’hanh ntul rlong, yơn ta nâm nău rđău kan sŏng di bah Đảng, Chính phủ rlău ăp năm kan hŏ mpơl kloh nuih n’hâm nsrôih âk, nsrôih têh, dâk kan lĕ n’hâm suan, ndrel ƀon lan, tahen lam dak geh ăp nău dơi têh kuâng, geh nkô̆ hôr lịch sử ta lĕ rngôch ăp trong kan. Dŭt njrăng uănh khlay, Chính phủ rgum tĭng ƀư lĕ n’hâm suan, geh nău dơi tam trong nchrăp  dăp rgum nuĭh kan lam trong chính trị glêh tam, kan nsĭt geh nău dơi, yach ngăch n’hanh rdâk njêng n’gâng kan 2 gưl n’hanh hun hao lam lĕ rngôch neh dak. Lah rđău đă ta rơh lễ, Tổng Bí thư Tô Lâm dăn đă n’hanh ŭch rŏng ăp nuĭh ndrel hăn tay Chính phủ nâp jâng chuat n’hao neh dak lăp tâm rơh mhe- Rơh lhung jong săk hun hao ndrŏng dăng, rsang rnglăy, têh uĕh bah rnoi nuĭh./.