VOV4.M'nông: Tâm ăp nar rlău aơ ta nkual ƀon têh Hồ Chí Minh hŏ ƀư Liên hoan phát thanh lam dak tâl 15 – năm 2022. Đah nkô̆ “Ngăch rgâl- bên di nsan hao”, Liên hoan phát thanh lam dak rơh dja geh rnoh đơn vị râng dŭt âk (86 đơn vị) n'hanh geh rnoh nău nchih tâm rlong dŭt âk, đah rlău 500 nău nchih. Aơ lah nar rgum nău way kan dŭt têh ngăn bah ăp nuĭh ƀư pơk ƀoh nău ngơi, geh suan ring tam dăng tâm lam mpôl.

        Liên hoan phát thanh lam dak dơi ƀư 2 năm 1 tơ̆, gay năl saơ, mpư rnê ăp nuĭh tơm nchih, nău nchih dŭt uĕh blău bah nuĭh ƀư báo phát thanh lam dak. Liên hoan phát thanh lam dak tâl XV – năm 2022 geh nkô̆ moh lah “Ngăch rgâl- bên di nsan hao". Bah rlău 500 nău nchih râng tâm rlong (dŭt âk bah ntơm tât aƀaơ), Ban tổ chức hŏ sơch luh 203 nău nchih lăp tâm rlong n'glĕ dŭt ta ăp ntil nău nchih bah phóng sự, ôp nău, nău ngơi lơn, pơk ngơi ƀoh sŏng dăng ...Ntŭk mhe bah Liên hoan rơh dja lah Ban Tổ chức leo ƀư tâm rlong n'hanh ntăm an ndơ nkhôm rnê bâr răk uĕh, nkhôm an ntil kỹ thuật rdâk njêng dŭt uĕh blău n'hanh ntil dŏng jâng nsing mbrô…

       Aơ lah tâl bar Liên hoan dơi ƀư ta nkual ƀon têh Hồ Chí Minh n'hanh lah nar rgum bah ăp nuĭh ƀư báo phát thanh tâm lam dak. Wa Phan Văn Mãi, Kruanh UBND nkual ƀon têh Hồ Chí Minh an lah, Liên hoan mô dơn lah nău kan chuyên môn nghiệp vụ geh nsing nơm âk ma hôm lah nău rŏng bah ăp nuĭh ƀư báo phát thanh đah nkual ƀon têh Hồ Chí Minh, ntŭk ma rlău 1 năm bah năp nơh hŏ mbrôn săk nơm bah năp nuh srê COVID-19 mô hŏ tă geh tâm kăl e:

         “Ăp nhà báo ndrel đah mpôl kan ta bôk trong rlong sial, n'hanh ƀon lan lam dak, dak bah dih hŏ tât đah tơm nuh srê ta rnôk dŭt krit nji. N'hanh nơm geh nău ntoh măt nê, lam dak  gĭt wât lơn, tâm pă âk nău jru lơn, ndrel hăn âk lơn đah nkual ƀon têh. Nkual ƀon têh dơi rgŏ jă, nsrôih lơn gay rlău rơh dŭt krit nji. N'hanh tâm rnôk nê, he hŏ saơ dơi nău khlay bah pơk ƀoh nău ngơi rnôk hŏ mpơl dơi nău khlay kan bah he”.

Liên hoan phát thanh lam dak tâl XV ta nkual ƀon têh Hồ Chí Minh lah "nar rgum" nău kan dŭt têh bah ăp nuĭh ƀư pơk ƀoh nău ngơi, geh suan ring tam dăng tâm ƀon lan. Tâm nê, bôk nău pơk ƀoh nău ngơi hŏ wăch rgum nău ŭanh khlay ngăn bah nuĭh djăt n'hanh lĕ ma ăp băl kan nsum. Bah meng ăp nkô̆ nău mhe lư duh ndal dơi nău lư uănh khlay ri ăp năch jă tât bah đơn vị râng tâm rlong ndjôt tât mông nar liên hoan âk nău lăp tâm nuih n'hâm đŏng. Nê lah ăp nău nkoch kơl nuĭh geh nău tât rmoh rmanh trôk nar lơh, dak bŭk, ŭnh sa. Nău nkoch "mô chôt prah" bah Hoàng Thị Mũ đah nău tâm rŏng kon nuĭh nkrum lam răm mƀak bah ăp nai ntĭm nti nkual yôk prêh, nău nkoch ngăn geh bah mpôl tahen puh n'hât ŭnh sa hŏ ƀư nkah jru tât lĕ rngôch ăp nuĭh djăt, uănh. Mô du hê nuĭh tâm rle măt uănh, ăp ntruh dak măt rngot yô̆. Nô Nguyễn Huy Hoàng, phóng viên Kênh Giao thông nkual ƀon têh Hồ Chí Minh nkoch:

 “Ma liên hoan phát thanh, ăp nău nkoch kơt bah thiếu tá Thành bah oh Mũ ƀư săk gâp nơm geh du nău rlău gĭt mô dơn mpeh nău kan ma mô mpeh nău tâm rŏng kon nuĭh đŏng, mpŏng aơ lah ăp suan ntrôl uĕh ring tam âk lơn, lah du suan ntrôl ring tam âk lơn gay ăp phóng viên mpôl hên gay nđơn tay ăp nău nkoch uĕh tât nuĭh djăt".

Wa Nguyễn Trọng Nghĩa, Bí thư Trung ương Đảng, Kruanh Ban Tuyên giáo Trung ương an lah, liên hoan ƀư tâm rnôk lam Đảng, lam ƀon lan n'hanh lam tahen he dôl mbrôn suan tâm rlong, nsrôih tĭng ƀư geh nău dơi Nghị quyết Đại hội đại biểu lam dak tâl 13 bah Đảng; du nuih n'hâm, nsum suan tĭng ƀư ăp trong nchrăp, trong kan bah Đảng n'hanh Ngih dak gay dâk hao n'hanh hun hao tay wăng sa- rêh jêng kon nuĭh lôch bah nuh srê COVID-19. Tâm rơh Cách mạng công nghiệp 4.0, ndrel đah nău hun hao bah ăp ntil báo chí way ơm, ntil báo chí mhe kơt báo điện tử n'hanh mạng xã hội njêng luh n'hanh hun hao dăng, njêng nău tâm rlong rgŭt n'gĭng đah ăp ntil báo chí way ơm. Jêng, Radio nău ngơi Việt Nam n'hanh nău kan pơk ƀoh nău ngơi Việt Nam ân rgâl mhe mbro nău mĭn, ôp joi trong ƀư mhe gay ngăch rgâl, bên di đah trong ƀư báo tâm  rơh mhe. Pơk ƀoh nău ngơi Việt Nam ân jêng mbrô pơk rlăch ndăng tay nău tih leh tâm nău rêh đah nău ŭch rdâk njêng trong kan di, geh suan rêh tâm ngăn ngăn, rgop tâm mât nâp đăp mpăn chính trị rêh jêng kon nuĭh n'hanh hun hao neh dak, pơk hvi nău tâm ban, n'hao nău dơi rđău kan bah Đảng, mât bôk kan bah Ngih dak đah nău rêh jêng kon nuĭh. Wa Nguyễn Trọng Nghĩa lah rjăp:    

          “Ăp nhà báo pơk ƀoh nău ngơi ân ntik uĕh tay lơn đŏng nuih n'hâm kơt nti êng, tiăr nti êng, n'hao dăng han săk chính trị, nuih n'hâm kan uĕh; tâm ôp tâm rgâl nău gĭt kan ƀư báo, geh nău mĭn êng nơm, nău mĭn rlăch ndăng ta năp ăp nkô̆ nău tih. Ăp nhà báo ân hăn jru, hăn dăch dêh ngăn ngăn tâm nău rêh, nkoch kloh n'hâm n'hôr bah nău rêh, lăp săk he nsum tâm mpôl, rêh tâm nuih n'hâm ƀon lan, kơt nê mơ dơi nchih ăp ntil  nău nkoch geh rnoh khlay, geh trong rƀŏng nău mĭn, nău rŏng kon nuĭh n'hanh nău geh ngăn ngăn n'hanh yor an ma nău geh neh dak, rnoi nuĭh".

Ăp nar ƀư Liên hoan phát thanh lam dak tâl XV ta nkual ƀon têh Hồ Chí Minh, bah meng ăp nău kan way kan khuh n'gôr, hôm geh ăp rgum nchră an ăp nuĭh ƀư  pơk  ƀoh nău ngơi Việt Nam tâm mâp, tâm nđŭr n'hanh tâm pă nău tă ơm gĭt kan đŏng. Nê lah  ăp nău kan Pla n'hơ "Nău dơi geh hun hao bah nkual ƀon têh Hồ Chí Minh", rgum nchră dak bah dih "Hun hao joi tơm geh wăng sa an ăp Radio ƀoh rup ƀoh ngơi tâm trong rƀŏng rgâl mbrô”, rgum nchră kỹ thuật “Ntul rlong bah pơk ƀoh nău ngơi tâm rơh rgâl mbrô", rgum nchră “Ƀư njêng bôk ƀoh nău ngơi djăt pâl tâm rnôk ntoh luh âk ndơ pơk uănh pâl sŏng dăng”. Nê lah "nar rgum" nău way kan têh bah ăp nuĭh ƀư pơk ƀoh nău ngơi, mpơl dơi nkô̆ “Ngăch rgâl- bên di nsan hao”./.

Nuĭh rblang: Điểu Thân