Mih têh ntoch jong, dak tu rsŭn ndal ƀư âk ntŭk mpeh nhâp nar n’gor Gia Lai ndâp băm, pĭch rlâm, ntung trong tăch gâl n’hanh khuch tât nău kan tuch tăm mât rong. Ta xã Ia Pa, dak bât ler Mơ Nang 2 tă geh băm, khan yơt êng rlău 300 rnăk ƀon lan; ntung si nthoi Ia Pa đah Ia Tul geh dak klôr rdu. Nklăp 7 ha ba n’hanh mbo geh dak bŭk. Ta xã Ia Hiao, rlău 180 ha tơm tăm geh tât khuch, lơn âk lah mbo, ba n’hanh âk neh tăm biăp tuh. Ăp xã Gào, Ia Krái, Phú Thiện geh dak băm, pĭch rlâm ta âk njăr trong hăn, nkual meng dak me, dak diăng đŏng. N’gâng kan ta ntŭk hŏ rgum mpôl kan, ntrơn du nuĭh ƀon lan luh bah ntŭk klach rvê, nkah njrăng lor ăp ntŭk geh tât khuch hô n’hanh nchih rgum khuch khat.

Bah năp nau tât bah mih têh, ôi lơ 9/9, ntŭk kan nchroh lor mih sial n’gor Dak Lak lŏ nkah nau njrăng khuch mrô 1 ndrel 2, geh mih têh, sial, nglaih dah, mih lŭ, nau tât mra geh dak rchoh ndrel luh neh. Rlau 300 kon se nti tâm 10 jrâu tâm 2 ntŭk Ngih săm ƀŭt Tiểu học Chu Văn An, xã Cuôr Dăng, geh rlu nti yor âk trong geh dak băm jri, dak tă bah ăp lô cao su hoch thăng ƀư băm, hoch thăng. Ƀon Aring, ntŭk geh ngih săm ƀŭt, ƀa ƀơ geh băm jru rnôk mih têh. N’gâng kan xã hŏ geh nau đă rklaih, nkre ndâk nau nchrăp nkra nâp ăp ntŭk rluh neh, ndâk ntŭk hoch dak.