Đah nau dơi bah bu ur rđau nau kan, yuh Rơ Châm B’Yich, xã Ia Krái, nkuăl Ia Grai, mro ndrel ma đoàn viên druh ndăm tâm ăp nau kan, nkre leo trong đah nau gơih ndrel nau kan. Yuh hŏ ndâk rmôt ‘Trong kơl an ŭch rŏng” kơl an ăp nŭih geh nau rêh jêr jŏt đah nau ƀư, kơt, pă nklâm ndơ ân ăp rnăk ach o, kơl an kon se geh nau rêh jêr jŏt lŏ hăn nti.

            Đah ăp nau nsôih mô rlu, yuh Rơ Châm B’Yich hŏ ndơn âk bằng khen tă bah ăp gưl. Yuh mbơh:

            ‘Gâp ŭch ngăn nau hăn kơl an, tă bah nau ŭch nê, săk gâp nơm mro joi ăp nau ueh lăng gay kônh wa tâm êp nơm bu kơt tĭng. Geh dêh tâm du rnăk vâl geh nau bay cách mạng, ri ma gâp gĭt ngăn nau khlay bah nau kan ntĭm nti dnrel ƀư tĭng nau rêh ueh ang Hồ Chí Minh. Tât năm 2024 gâp geh ndơn nau nkhôm 15/10, gâp rhơn ngăn. Gâp mĭn nơm ƀư nau kan knŭng lah ân geh nau kơl an dơm, mô mĭn mra geh nau ndơn nkhôm aơ ri ôh. Gâp lah ueh ma rđau kan Trung ương, nkuăl hŏ kơl an bonh đă gâp. Săk gâp nơm êp tât ân geh nsôih lơn tay tâm ăp nau kan’.

            Năm nti mhe rlau, Nguyễn Hà Bảo Khanh, kon se nti jrâu 12 C1, Ngih săm ƀŭt THPT Chuyên Hùng Vương, nkuăl ƀon têh Pleiku, lah kon se nti du hê bah n’gor Gia Lai geh Trung ương Đoàn druh ndăm Cộng sản Hồ Chí Minh pă nau dơi “Kon se 3 nau ueh” gưl Trung ương. Mô êng blau tâm nau kan ntĭm nti, oh hôm nsôih râng ăp nau kan đoàn, hội. Oh kŏ râng ndrel geh geh âk nau nkhôm prêh tâm ăp rnôk tâm rlong gưl n’gor ndrel Trung ương mpeh nau mĭn blau khoa học kỹ thuật, ndâk nau kan ndrel nkra Robot. Nguyễn Hà Bảo Khanh, nkoch:

            ‘Tâm ăp nau tâm rlong ri kŏ geh tât âk nau ueh ngăn ân ăp băl kon se nti, mô êng lah nau gĭt lơn ma n’ăp ma nau blau đŏng. Rnôk mâp ăp nŭih râng rlong nsum đah nơm ri nơm kŏ mra geh kơt tĭng âk ngăn nau ueh. Ndrel kŏ ueh lơn đŏng lah nơm geh dơi nau geh nkhôm kon se nti jrâu 12 ƀư ueh nau kan Trung ương ndrel gâp mĭn aơ lah nau nsôih têh gay gâp hun hao tâm nau ntĭm nti ndrel nsôih lơn tay”.

            Tĭng Hồ Thị Giang Thảo, Bí thư Đoàn n’gor Gia Lai, druh ndăm tâm n’gor hŏ ndrel dôl ƀư ueh nuih n’hâm kơl an lor, mô rlu tâm nau ntĭm nti ndrel pah kan blau mhe, nsum ty ndâk njêng ƀon tơm Gia Lai nar lơn ma sâm geh:

            ‘Phung hên mra lŏ ntrŭnh âk bôk nau kan gay ƀư nau rđau mrô 05 bah Bộ Chính trị mpeh nau ntrŭt dăng nau ntĭm nti, ƀư tĭng nau mĭn, nau kan Hồ Chí Minh. N’hao nau rđau kan bah Đảng ndrel nau kan ntĭm nti nau mĭn cách mạng, nau kan, nau rêh, nau ueh ân rơh mom, ndrel ma nau rnê nkhôm, pơk hvi ăp nau ang, nau nkoch ueh bah đoàn. Êp nê, lŏ ntrŭt dăng nau kan ndrel ntrŭnh ƀư nau kơl an nau ntrŭnh “3 tâm rngop” gay mom ndăm Gia Lai mra lŏ râng đah ăp gưl n’gâng kan gay ndâk, bonh đă druh ndăm râng ndâk ƀon lan mhe, nau rêh ueh mhe”./.