VOV4.M'nông: Tâm 2 nar 26 n'hanh 27/7, Bôk nău kan Trại hè Việt Nam 2022 ƀư du đêt nău kan ta nkual ƀon têh Huế, n'gor Thừa Thiên Huế. Bôk nău kan dja ƀư ntơm bah nar 19/7 tât 3/8 ta 9 n'gor, nkual ƀon têh đah nău tât râng bah 108 nuĭh ntơh măt ntơm bah 16 tât 24 năm deh, ntơh măt an rơh mom ndăm nuĭh Việt Nam ta dak bah dih plơ̆ sĭt bah 25 dak.

Ta Huế, ăp nuĭh tâm mpôl kan Trại hè Việt Nam 2022 râng âk nău kan kơt tâm rlong rŏ nău tiếng Việt, hăn uănh pâl Chùa Linh Mụ, Đại Nội Huế, pă nklâm ndơ kơl, tâm nđŭr pâl rlưn nsum ta meng dak lêng Lăng Cô. Mpôl hăn dơi rlong sa ăp ndơ sa kah khlay n'hanh rlong ngêt ăp ntil trà cung đình Huế. Kơp ntơm bah năm 2004, Trại hè Việt Nam hŏ wăch rgum nău tât râng bah 2.000 druh ndăm, sinh viên nuĭh Việt Nam tât bah 30 dak n'hanh nkual neh. Ăp nuĭh ntơh măt râng bôk nău kan lah ăp nuĭh ntoh lư tâm ăp trong kan kơt nti, thể thao, njroh mprơ n'hanh geh nău rgop uĕh an trong leo rdâk njêng nsum mpôl./.

Nuĭh rblang: Điểu Thân