Tâm ngih măy mhe sa nkra bah Công ty TNHH Luyện kim Trần Hồng Quân, nkual công nghiệp Nhân Cơ, n’gor Lâm Đồng, ăp băng chuyền ntơm nchoăt. Jêh gưl điện phân, nhôm  dak dơi troch tâm mang, ƀư nđik n’hanh tĭng trong way nkra njêng jêng ăp mpơng nhôm bôk năp moh săk Việt Nam.

Wa Trần Hồng Quân, Giám đốc Công ty TNHH Luyện kim Trần Hồng Quân an gĭt, gưl bôk năp bah ngih măy 450.000 tấn/năm, lĕ pơk dŏng ueh. Doanh nghiệp nchrăp n’hao 300.000 tấn/năm tâm 12 khay năm aơ n’hanh geh lĕ rngôch geh tâm 3 khay năm 2027. Bah kơi ăp mpơng nhôm bôk năp nĕ lah trong hăn rlău du rach năm rlet rlău âk jêr jŏt đah prăk, công nghệ, ndoh ndơ n’hanh ngih wâl.“11 năm kâp, tât aƀaơ, Công ty Luyện kim Trần Hồng Quân ntô̆ n’hao mbơh mpơng nhôm bôk năp bah Việt Nam. Tâm trong ndâk ƀư ngih măy mâp mô đêt jêr jŏt, wăk kol. Yơn lah, đah nău uănh kơl ntĭm rđău bah Đảng, Chính phủ, nău hăn ndrel bah n’gâng kan ƀon lan, ăp rmôt kan prăk kaih, nuĭh kan ndrel n’hanh lĕ rngôch cán bộ, nuĭh pah kan, mpôl hên lĕ ntơm rlet rlău gay jêh nău nchrăp ƀư”.

Mpơng nhôm bôk năp mô knŭng an saơ du ndơ mhe dơi ƀư luh tâm dak. Rnôk dơi geh âk du năm 450.000 tấn, rnoh khlay nkra njêng bah nău nchrăp ƀư dơi geh nklăp 1 rmen 400 rbăn đôlar du năm, tâm ban 36.000 rmen prăk. Ndrel đah 1.000 nuĭh pah kan na nê̆ geh nti nău way kan, kỹ thuật n’hanh mât uănh, nău nchrăp ƀư geh tay nklăp 3.500 tât 4.000 nău kan pă an ndoh ndơ, ŭnh nar, nchoăn rdêng, logistics, cơ khí, nău rhŏ n’hanh tăch rgâl.

Đah Nhân Cơ, ăp rnoh mrô nĕ dôl pơk luh du ntŭk hun hao mhe. Nău ŭch pah kan kỹ thuật, jay gŭ, nchoăn rdêng, logisticss, tăch rgâl, nău rhŏ mbra hao tĭng ngih măy. N’gor dôl nchrăp ntêm neh gay wơt ăp nău nchrăp ƀư công nghiệp bah kơi tay.

Tĭng wa Phan Anh Tuấn, Bí thư Đảng ủy xă Nhân Cơ, du đêt pah kan mom lĕ dơi ndơ̆ hăn nti gay nchrăp pah kan ta ngih măy. Ngai lơn, xă dôl mĭn dăp rgum Nkual công nghiệp Nhân cơ 2 nklăp 400 ha; nkre nchrăp ntŭk an jay gŭ phung pah kan, nuĭh way kan, logistics, tăch rgâl n’hanh ăp nău nchrăp ƀư nkret njêng jru bah kơi nhôm. “Mpeh jŏ jong, đah Nhân Cơ mpôl hên lĕ nchrăp ăp nău dơh gay wăch rgum ntuh kơl, ntrŭt ngăch ntuh kơl, jă ăp nuĭh ntuh kơl ân mbơh ƀư ăp ndơ jru nhôm. Aƀaơ ngih măy mhe nkra njêng luh nhôm mpơng, mô hŏ n’gluh an ăp ndơ bah kơi nhôm... Mpôl hên lĕ nchrăp neh, dăp rgum nkual công nghiệp logistics, nău rhŏ tăch rgâl gay wơt bôk an nău hun hao tâm năm tât”.

Mô knŭng nkra njêng nhôm mpơng, ngih măy dôl pơk hvi an n’ăp trong nkra njêng bah kơi. Nhôm kim loại dơi jêng ndơ an ăp nău kan cơ khí ê nkra, ndơ mhe, ndơ điện tử, ntung trong nchoăn rdêng n’hanh ŭnh nar ê nkra.. Nĕ lah trong hun hao Lâm Đồng n’gluh an jêh nkra njêng lôch ueh nhôm mpơng bôk năp. Wa Y Thanh Hà Niê Kđăm, Ủy viên Trung ương Đảng, Bí thư N’gor ủy Lâm Đồng mĭn lah:

“Bah ndơ nhôm mpơng bôk năp, mô knŭng geh nkô̆ nău đah nkra njêng ma hôm pơk dơi jêng trong khlay công nghiệp mhe, wăch rgum ăp nău kan cơ khí ê nkra, ndơ mhe, công nghiệp ntop kơl, ndơ điện tử, ntung trong nchoăn rdêng, ŭnh nar nkra njêng n’hanh âk ntil công nghệ mhe hun hao ta n’gor Lâm Đồng kơt nkual Tây Nguyên”.

Bah neh chăng bazan tât ăp mpơng nhôm nglang lah trong ndơ̆ neh bri hăn du njoat ta trong khlay. Rnôk nhôm duh hoch ta Nhân Cơ, Lâm Đồng dơi nthoi jong đah ăp ngih măy nkret njêng jru, khlay bah bauxite Tây Nguyên mbra mô knŭng dơi kơp đah rnoh khoáng sản joi nkra, ma đah công nghiệp, nău kan n’hanh rnoh khlay hao dơi luh dâl ta nkual neh aơ.  
 

-