Tâm ăp nar êp khay 3 aơ, âk jrâu geh ntĭm nti sŏng ndrel trực tuyến mpeh AI, ntrơn rgâl mrô dôl ma geh ƀư tâm ăp druh ndăm tâm lam dak, tâm nê geh druh ndăm rven. Ăp nŭih geh nau blau mpeh AI, nŭih njêng nkô̆ mrô ntoh lư lĕ nkoch ăp nau ueh, ngăn ndrle nơh dŏng tâm nau kan ăp nar bah nŭih rven.

            Bol ma rven tâm jâng ndrel ncho ndeh rlă, yơn nô Đoàn Ngọc Chiến, ƀon tơm Hà Tĩnh mô geh lơi du nar rnôk bu ntĭm. Nô djăt ndrel ma nchih ăp nau mhe kơl an nau kan rnôk râng hăn nti tâm nau bu ntĭm nti yor Rmôt druh ndăm rven Việt Nam ƀư, nô Chiến nkoch:

            ‘Nau kan tơm bah gâp lah tăch ndoh ndơ Petshop. Gâp ndơn saơ ƀư nau kan tăch rgâl rmô rnôk aơ hun hao ueh, ngăn lah tâm ăp nau ƀư tiktok, nau ŭch bah gâp lah dŏng blau nau kan AI tâm nau hun hao nkô̆ nau, ndâk bư ăp nkô̆ nau, video viral...Rnôk gĭt rmôt druh ndăm rven Việt Nam ƀư Bôk nau kan kơl mbơh nau ntĭm nti ân nŭih rven, ri gâp hŏ đăng ký râng, nŭih rven geh kơl an gĭt âk lơn tât nau kan AI, gay dơi joi nau kan pah ân tâm di ndrel kơl an săk nơm. Gâp ŭch jêh geh kơt nti ri nơm mra dơi njêng ăp nkô̆ nau, video viral nê ma mô kâp đă bu êng tay ôh”.

            Êp nau kan ƀư tăch ndoh ndơ ân mpa rong, ta Hà Nội, nô Đoàn Ngọc Chiến hôm nkoch mbơh ntŭk kan ntĭm nti nau kan ndrel hun hao nau dơi ân nŭih rven Việt Nam. Ndri ma, rnôk râng jrâu nti, nô Chiến hŏ geh ăp nŭih mbơh tât nau dŏng AI kơt lah Copilot đah nau blau ndrel nau ma păng kơl nơm tâm nau kan ăp nar: Mpeh nau mbơh dŏng ƀư rnoh dơi, nau blau nkra, nau nchrăp nau ntĭm nti ndrel dŏng gay ƀư nau nchih rplay săm ƀŭt ngăch, njêng nau mbơh, ndâk nau ŭch:

            ‘Nau kan lah nkoch mbơh nautâm ntŭk ntŭk kan bah ntŭk rgum ƀư, ƀư ăp nau kan gay ma kuăl jă nau ntuh kơl an, ndâk ăp nau kan gay hun hao ân ntŭk ƀư kan...ri ma ân tât rnôk râng bôk nau kan ndrel geh ăp nŭih blau mpeh AI mbơh, kơl an, gâp geh gĭt âk lơn tât nau kan mrô gay ma dơi ƀư joi ndrel saơ gĭt nau dơi bah săk nơm gay ma dŏng tâm nau kan bah nơm, kơt copilot, gâp dơi dŏng tâm nau nchrăp ƀư nau kan, njêng nkô̆ nau nkoch mbơh, ăp nau mĭn dơi gay hun hao nau kan”.

            Tĭng ăp nŭih mbơh nchră nau kan, tâm âk năm tât, geh 65% nau kan rnôk aơ geh rgâl ma công nghệ. Aơ lah nau dơi gay rơh mom rven Việt Nam geh kơt ntĭm nti mrô, rƀŏng kan pah, ndâk nau kan, tăch rgâl Online, râng tâm nau kan rêh jêng. Bah năp nau aơ, rmôt druh ndăm kơl nŭih rven Việt Nam hŏ ndâk nau kan “Kơl mbơh ntĭm nti mrô” rgum ntrong nŭih blau bôk năp tâm ăp nau kan kơt: Ai, Blockchain, Đăp mpăn ndrel mât mpôn nau, Nŭih njêng nkô̆ nau mrô, Bình luận viên, nkra đồ hoạ, Lập trình...râng nau ntĭm nti ăp nau mhe, dŏng nơih ngăn tâm pah kan ndrel nau rêh ân druh ndăm rven geh nau dơi. Nô Phạm Văn Thành, Kruanh rmôt kơl an druh ndăm Rven Việt Nam, mbơh:

            ‘Phung hên ƀư ăp jrâu sŏng ndrel trực tuyến tâm 3 khay tât. Nar aơ lah nar bôk năp mbơh tât Vopilot bah Microsoft. Êp nê, hên kŏ tâm rgop ma ăp rmôt kan geh nau dơi lah ăp băl mra dơi râng ngăn tâm nê gay kơt nti nau blau dŏng AI...ndrel nau dơi rdâng phung rlăng mro geh mbơh ăp nau tât nau đăp mpăn nau mbơh, mât nau dơi kŏ kơt lah ăp nar ntĭm nti sŏng mra kơl an nau kan ntĭm nti mrô ân druh ndăm rven Việt Nam ân săk tam”.

            Kơl an râng nau kan bah rmôt “Ntĭm nti rmô”, ăp nŭih du nau kan ntĭm nti, nkoch mbơh nau mpeh AI, kơl an nŭih rven tâm rnglăp tâm nsum mpôl ndrel mra dơi ndâk nau kan. Tă bah nê, khân păng kơl ăp nŭih ê blau mpeh rmô mpeh nau kan mhe aơ. Nô Lê Công Thành, nŭih ndâk nau blau nau kan “Kơl mbơh ntĭm AI’ nkoch:

            ‘Ăp nŭih pah kan tâm nau rêh kŏ ân dŏng nau blau njêng mhe, tâm âk rnoh dơi êng êng, kơt: Dŏng tâm nau kan mô lah ntĭm nti, geh rnoh dŏng êng tâm nau rêh jêng ăp nar. Kơt lah du ntil ndơ sa ma nơm dơi geh njêng dơi ndơ kah ueh dŭm âk. Ndri ma nau blau dŏng ndơ dŏng blau njêng mhe rnôk aơ lah nau khlay. Yơn lah, păng lŏ mhe, ê geh nŭih dŏng ngăn ngên. Nau ma gâp kơt nti lah nau blau njêng mhe. Gâp ŭch lah jêh aơ dơi rêng geh nau blau dơi njêng mhe mô knŭng âk nŭih rve bah Việt Nam geh dŏng ma hôm dơi nkoch mbơh nau ueh ân ăp nŭih ê blau mpeh nau kan mrô”.

            Ntrơn rgâl mrô dôl mô rlu geh rêng ăp nau kan, pơk luh ăp nau dơi gay nŭih rven nchrăp blau lơn tâm nau ndơn nau kan, dŏng nau mhe ndrel tâm rnglăp tâm nau rêh, njêng nau tâm ban tâm nau rêh jêng. Ăp jrâu pơk ntĭm nti mrô dôl ma ăp nar, ăp mông rêng nau blau mrô tâm druh ndăm rven lah êng kŏ kơt lah tâm lam ƀon lan, kơl an Việt Nam ndâk du nau rêh mrô mhe, mra tâm nglăp ndrel hun hao./.