Lĕ jêng nău bên, ăp ôi, wa Pang Ting Sin (nuĭh K'Ho) ta phường Lang Biang - Đà Lạt, n'gor Lâm Đồng lĕ  geh uănh djăt ăp nău mhe ntoh lư tâm  điện thoại thông minh. Wa pơk ứng dụng, lăp ăp ntŭk mbơh rnoh mbrô bah Radio nău ngơi Việt Nam n'hanh joi tât bôk nău ngơi K'Ho. Ăp nău lư ntoh ta măt điện thoại đah nău ngơi bah rnoi nuĭh he nơm. Wa sơch du nău lư, djăt uănh răk:

“Mpôl ntơh măt Đảng Cộng sản Việt Nam tă bah đồng chí Lê Hồng Quang, Groi Kruanh Ban Nội chính Trung ương ƀư Kruanh mpôl hŏ khâl nhanh pah kan ta Brasil".

25 năm ba năp, Bôk nău ngơi K'Ho bah Radio nău ngơi Việt Nam  dơi pơk ƀoh nău ngơi. Ndrel đah pơk ƀoh nău ngơi way ơm, ăp bôk nău ngơi dơi nchih ta website n'hanh ăp ntŭk mạng xã hội. Trang Facebook "Tiếng K'Ho VOV Tây Nguyên" aƀaơ geh rlău 9.300 nuĭh tĭng djăt. Wa K'SiMôn -Kruanh Ban pah kan Mặt trận thôn Lộc Bảo, xã Bảo Lâm 5, n'gor Lâm Đồng an gĭt: ăp nău mbơh mpeh nău rêh, nău kơl bah Đảng, Ngih dak n'hanh ăp nău nkoch văn hóa dơi nchih đah nău ngơi rnoi nơm ta ăp ntŭk pơk mbrô bah Radio nău ngơi Việt Nam, kơl kônh wa dơh djăt, dơh wât n'hanh dơh gĭt lơn.

Gâp gĭt tât bôk nău ntuh ngơi nău K'Ho bôk năp lah bah Facebook. Bah nĕ gâp gĭt âk lơn nău lư ma nău K'Ho bah gâp. Săk gâp nơm way pơk răk n'hanh djăt ăp nău lư dơi nkoch trêng ma nău K'Ho, Mạ đŏng, yor kơt nĕ gâp mơ gĭt âk lơn đŏng. Ŭch rŏng kônh wa rnoi K'Ho, Mạ djăt gay gĭt âk nău lư ma nău rnoi nơm, bah nĕ rgop tâm nău mât ndray, mât uĕh n'hanh hun hao nău ngơi rnoi K'Ho, Mạ nar lơ hun hao".

Mô knŭng ndơ̆ nău lư tât đah kônh wa, bôk nău ngơi K'Ho bah Đài TNVN hôm rgop mât nău ngơi bah rnoi nuĭh. Wa Cil Poh, Groi Kruanh Ủy ban nhân dân phường Lang Biang - Đà Lạt, n'gor Lâm Đồng an lah, nău dja lơ geh nkô̆ khlay tâm nău rêh nar aơ, rnôk du đêt nuĭh K'Ho chuêl nău ngơi mô lah mô gĭt nchih rplay sam ƀŭt rnoi nuĭh he nơm.

"Aƀaơ geh du đêt nuĭh K'Ho mô hôm gĭt ngơi, gĭt nchih nău ngơi rnoi nuĭh he nơm. Radio nău ngơi Việt Nam pơk ƀoh nău ngơi K'Ho lah nău dŭt khlay. Nkoch trêng đah nău ngơi K'Ho kơl an  kônh wa n'hao nău gĭt êng, gĭt wât. Gâp mpŏng ŭch Đảng, Ngih dak mât uănh tay, n'hao pơk ƀoh nău ngơi K'Ho gay rgop mât ndray n'hanh mât uĕh nău ngơi K'Ho."

Ta ăp ntŭk hôm nha geh âk nău jêr jŏt, nău mbơh tơih nău mhe tât đah ƀon lan bâh nău ngơi rnoi đê̆ lơn ma geh nău khlăy. Ta xã Đam Rông 4, n'gor Lâm Đồng, rlău 90% rnoh nuĭh lah ƀon lan rnoi đê̆, dŭt âk lah K'Ho Cil n'hanh M'nông. Wa Lơ Mu Ha Poh, groi Bí thư rnâng kan xã Đam Rông 4 an gĭt: đah ƀon lan ta aơ, ăp nău mbơh mpeh nău ntrŭnh, nău kơl bâh Đảng, ngih dak, mpeh nău rêh, pah kan n'hanh văn hóa geh mbơh đah nău ngơi K'Ho, M'nông kơl an ƀon lan dơh gĭt vât lơn.

"Radio nău ngơi Việt Nam way uănh khlay, hăn ndrel đah gưl ủy, n'gâng kan ta ntŭk. Lơn lah, xã Đam Rông 4 geh âk ƀon lan rnoi mpôl đê̆ K'Ho Cil n'hanh Bunong gŭ rêh. Radio hŏ ngăch ndơ̆ nău lư bah ta ntŭk tât đah kônh wa, nkre nkoch ăp nău khlay văn hóa way ơm uĕh lăng bah ƀon lan tât đah nuĭh ƀon lan lam dak."

Rlău 80 năm aơ, ntơm bah nar Radio nău ngơi Việt Nam pơk nău ngơi bôk năp, nău nteh bah Radio hŏ tât đah ăp nkual neh dak. Đah bôk nău ngơi K'Ho tă bah Nhih pah kan way gŭ kan nkual Tây Nguyên ƀư lĕ geh 25 năm hăn ndrel đah ƀon lan. N'hanh rnôk nău ngơi K'Ho dơi pơk ta sóng lam dak, dơi ndơ̆ mbơh ta mạng, rgop rêng hvi dăng nău ngơi, văn hóa bah rnoi nuĭh nơm ta lam ntŭr neh.