Tâm thôn Mê Ka, xã Đam Rông 4, rnăk nô Liêng Hót Ha Ngát hŏ nchrăp tŏng ndrôm săm ƀĭt nti, kho ao, mâng nchih ân ma bar nŭih kon, du hê nti jrâu 11, du hê nti jrâu 4. Rêh tâm xã jêr jŏt ngăn ngên, nau rêh hôm geh âk nau pah pât, yơn đah nô ngát, rvăt năp ân kon hăn nti lah nau ntuh kơl mô dơi mô geh. Nô ân lah, tâm du nau rêh mhe, nau gĭt blau nê lah nau ueh gay rơh mom geh dơi nau gĭt ndrel mô geh nchlơi êng ba kơi:

            ‘Hăn nti lah nau khlay ngăn ngên gay jêh aơ geh nau dơi gay kon sau nơm hun hao lơn. Mô dơi ma âk kon sau nơm geh nchlơi êng ba kơi ôh. Yor lah jêh aơ nau kan mrô hôm, geh nau rgâl mhe bah neh dak ri ma ŭch âk ngăn nau blau, ŭch ngăn âk nau geh dơi êng êng. Bol ma geh nau jêr yơn lah ân nsôih ân kon nơm hăn nti”.

            Nau rhơn ngăn lah nau mĭn nê nar lơn ma geh âk ngăn tâm ăp ƀon lan nkuăl jru ngai bah n’gor Lâm Đồng. Tâm ăp năm lăp nti mhe, ăp rnăk vâl nchrăp dăp rgum prăk gay ma rvăt săm ƀŭt, kho ao, ndơ dŏng nti ân kon, ăp rnăk hôm jêr jŏt ri kŏ nsôih đŏng, mô lah manh prăk bu gay ma năp ân kon hăn nti. Mô knŭng mât kơl an nau ŭch bah năp măt, âk rnăk hôm uănh khlay tât nau rƀŏng ân kon nơm hăn nti, nti nau kan ndrel mât nau ơm yau ueh. Khân păng gĭt lah, nti mơ geh nau gĭt, mơ geh nau blau, nau kan, yơn kŏ lah ntrong gay ăp rơh mom geh nau blau rnôk luh bah ƀon lan. Nô Liêng Hót The, rnoi K’ho tâm Tổ dân phố Bắc Tà Nung, Phường Cam Ly-Đà Lạt, nkoch:

            ‘Tâm rnăk vâl hên hŏ nchrăp ân ma kon nơm kloh ngăn mpeh nau vay ơm nê lah nau tơm. Tă bah nê, rnôk kon nơm têh jêng ri nơm ân păng hăn nti tâm boh, tâm n’ur tâm ngih săm ƀŭt gay ma nkoch mbơh nau geh dơi ân ăp băl tâm ngih săm ƀŭt. Jêh aơ, ăp kon nơm pah kan tâm ntŭk aơ ntŭk êng ri mra saơ rhơn ntô̆ n’hao mpeh nau vay ơm bah nơm đŏng”.

Lah geh nau nchrăp ueh bah me mbŏ pơk tay ân nau dơi bah rnăk vâl, ri tâm ngih săm ƀŭt, nau nchrăp năm nti mhe kŏ geh ntrŭnh ƀư tă bah ơm. Tâm xã jêr jŏt ngăn bah  Đam Rông 4, năm nti aơ geh rlau 4.300 kon se nti ntơm jrâu mầm non ân tât Trung học cơ sở, ngăn lah kon nŭih rnoi mpôl đê̆. Ăp ngih săm ƀŭt geh ntuh kơl nâp nâl, kloh, ueh; jrâi nti, ngih nti ndrel ăp nau dơi gay kơl an nau kan ntĭm nti geh nchrăp ueh. Nai nti Phạm Thị Ngọc Bích, Hiệu trường Ngih săm ƀŭt Mầm non Đạ Tông, xã Đam Rông 4, mbơh:

            ‘Tâm jrâu nti ti nai ntĭm geh nau nsôih ueh ngăn, ndâk âk ntŭk kan ntĭm nti âk kloh ueh, tât jrâu ntĭm nti ri kon se geh uănh ăp nau kan ân tâm di ri ma geh nau dơi rgum kon se hăn nti. Ngih săm ƀŭt Mầm non Đạ Tông kŏ ƀa ƀơ ƀư ăp nau kan tâm n’ur geh nau tât uănh bah me mbŏ, nai ntĭm nti ndrel kon se nti đŏng, bah nê ri me mbŏ kon se lơn ma geh nau đăp mpăn rnôk njoăl kon nơm hăn nti tâm ngih săm ƀŭt”.

            Lâm Đồng rnôk aơ geh 100 xã tâm nkuăl rnoi mpôl đê̆ ndrel gôl yôk; tâm xã geh 27 xã jêr jŏt ngăn ngên, 5 xã n’har bri ndrel đặc khu Phú Quý. Lam n’gor geh rlau 182.00 kon se nti rnoi mpôl đê̆. Tâm xã nkuăl hôm âk nau jêr, trong hăn nti hŏ pơk luh âk nau dơi ueh ngăn gay ma geh nau gĭt, jêng ngoai tâm ăp mpông trong kơl an ƀon lan rgâl rgâl nau rêh.

            Wa Ntơr Ha Krong, tâm thôn Đạ Nhinh, xã Đam Rông 4, geh 3 nŭih kon hŏ lôch nti đại học. Ntơm bah nau nkoch bah rnăk vâl nơm, wa rnơm lah, geh nau blau ri mơ kônh wa nơm geh tay nau nsôih ƀư tơm nau rêh, ntơm bah nau kan tuch tăm ân tât nau geh dơi dŏng nau blau mhe:

            ‘Kăl e nơh nau hăn nti ri mô geh âk ôh, ri ma rnôk aơ lah ma mô geh rplay săm ƀŭt ri mô blau dơi ƀư nau kan ơm. Bol ma nơm mô geh nau ƀư têh jêng âk ơm, knŭng lah nơm gĭt dơu nau mât chăm ân tơm tăm mô lah răk moh ăp ntil phân jêh ri dak si kŏ ân geh blau play săm ƀŭt. Rnôk aơ, lah nơm tŏng nau dơi ri hăn nti Đại học lĕ. Ntơm rnôk geh play săm ƀŭt mơ dơi hun hao tâm ăp nau dơi tâm nau rêh”.

            Nteh gâr lăp năm nti mhe hŏ rêng lam tâm ăp ƀon lan bah n’gor Lâm Đồng, leo tât nau rhơn bah năp năm nti mhe. Nau rhơn nê ntoh tâm nau ntuh kơl bah n’gâng kan ân nau kan ntĭm nti, nau nsôih bah ăp nau ntĭm nti kon se, tât nau mât chăm, nau kơl an răk bah ăp rnăk vâl nŭih rnoi mpôl đê̆. Aơ lah nau leo ntrong lor gay ăp kon se tâm nkuăl rnoi mpôl đê̆ bah lâm Đồng rnơm lơn tâm nau lăp nti, têh jêng, nchih nkoch tay nau geh dơi ueh reh nkre tâm ƀon tơm nơm./.