Ăp nar aơ, ăp rơh mih na nao jŭr ăp ntŭk ndâk ƀư Ngih samƀŭt Nội trú 2 gưl nkual n’har bri n’gor Gia Lai. Ta xă Ia Chia, nău ndâk ƀư bah dih trôk âk rơh an rlu. Ăp rơh mih bah, hang rhiăng phung pah kan lŏ ndăn tĭng mông gay ndâk ƀư ntop ngăch. Wa Vũ Phúc Tuân-Kruanh ntĭm rđău ntŭk kan ta xă Ia Chia, n’gor Gia Lai an gĭt: “Đah rnoh nău kan hôm ƀa ƀă dŭt âk, Tổng Công ty mpôl hên dôl rgŏ jă rmôt kan bah mpeh Bắc lăp. Gay rgum ngăch, mpôl hên rwăt vé ndeh păr gay ndơ̆ phung pah kan lăp ntŭk kan. Aƀaơ, trong kan lôch jêh, mpôl hên rgŏ jă 40-50 phung pah kan bah Bắc lăp. Rlău ma nĕ, mpôl hên dŏng công nghệ krih, ntop đah nuĭh ƀư gay ntrôl ngăch, ƀư ntop mông kan, geh nău kơl an phung pah kan”.

Ngih samƀŭt nội trú 2 gưl xă n’har bri Ia O mbơh đŏng mpeh nău mbrơi. Wa Nguyễn Dũng Anh, Groi kruanh ntĭm rđău ntŭk kan an gĭt, ăp ndơ ƀư n’gul gâl đă nuĭh kan gĭt blău âk, dŭt jêr săch bah nuĭh kan tĭng khay. Nuĭh ndranh knŭng dơi ntop ngăch đah ăp mông kan măng: “Aƀaơ, ăp nău kan ƀa ƀă an nuĭh kan hăr ty kan âk, kơt ntă gạch, lôch jêh. Mpôl hên dôl rgum n’hanh rgop\ jă tay nuĭh kan gay ƀư măng, ƀư ntop mông gay ngăch jêh. Aƀaơ, lĕ rngôch cán bộ, kỹ sư kơt nuĭh pah kan nsrôih jêh da dê, jao an ntŭk ngih samƀŭt bah năp ntơm năm nti mhe”.

Tât n’gul khay 8, rnoh ndơ nglăp lĕ rngôch 7 ngih samƀŭt nội trú 2 gưl Tiểu học n’hanh THCS ta ăp xă n’har bri n’gor Gia Lai geh nklăp 85%. Ăp jrô nti, ký túc xá n’hanh jay dŏng âk ntil lĕ jêh, yơn du đêt ndơ kơt jay ngêt sa, jay hiệu bộ, jay công vụ nai hôm e mbrơi bah 5 nar tât n’gul khay.

Gay ntop kơl ăp nuĭh ndranh ntop ngăch, bơi 780 cán bộ, tahen tĭng tay ntŭk kan bôl lĕ jêh nău kan dơi jao. Đại tá Nguyễn Công Ngân-Groi Chính ủy Sư đoàn 320, Quân đoàn 34, ntĭm rđău rmôt ntop kơl ta ntŭk kan xă Ia O an gĭt: “Êng Quân đoàn 34, mpôl hên ntop kơl ta xă Ia O, lĕ ƀư jêh nău kơl xây lĕ rngôch rlău 3000m2 mpir wăr ngih samƀŭt. Rlău trong nchrăp bah 18/7. Aƀaơ hin, rmôt mpôl hên kơl nuĭh ndranh ndâk ƀư ăp nkual mpeh tâm ngih samƀŭt”.

Âk pơh bah năp, kruanh UBND n’gor Gia Lai uănh nđôi na nao ăp ndơ ƀư, nău kan đah nuĭh tơm ntuh kơl n’hanh nuĭh ndranh gay dôh rklaih ăp wăk kol mhe ntoh.

Wa Lâm Hải Giang, Groi Kruanh UBND n’gor Gia Lai, mĭn lah n’gor mkra rgâl nar jêh nău nchrăp ƀư; đă ăp ntŭk kan rgŏ jăng dŭt n’hâm nuĭh kan, ndoh ndơ, rdâk ƀư khoa học n’hanh kơl lor jêh ăp ndơ ƀư khlay rhŏ an năm nti mhe.“Ăp ntŭk kan, nuĭh ndranh an mĭn ngăch ntơm năm nti mhe ta 7 ngih samƀŭt nội trú 2 gưl lah quân lênh, nău đă bah play nuih bah ăp đồng chí. Đah ăp trong, he an rlet rlău jêr jŏt, nsrôih n’hanh dŭt n’hâm ƀư an dơi ăp ndơ ƀư rhŏ an nău nti bah ăp mon, gay lăp năm nti mhe, ăp mon geh ngih samƀŭt mhe”.

Knŭng hôm rlău du pơh bah năp nar ntơm nti, ta ăp ndơ ƀư Ngih samƀŭt Phổ thông 2 gưl nội trú Tiểu học n’hanh Trung học cơ sở ta ăp xă n’har bri n’gor Gia Lai, ăp ntŭk kan dôl ndăn đah mông nar gay jêh ngăch wơt hang rbăn kon hŏk lăp năm nti mhe tâm ăp ngih samƀŭt têh ueh, rĭng ăp tâm ban.