Tĭng nău mbơh, dĭng lĕ ndơ ta ntŭk (GRDP) tâm 6 khay bôk năm bah Lâm Đồng knŭng geh nklăp 7,9%, đêt lơn nău n’gluh an. Ta năp n’hêl na nê̆, âk đại biểu HĐND n’gor đă UBND n’gor ƀư kloh ăp nău rmeh hao jêng hôm ƀa ƀă tâm n’gul dŭt năm. Rblang ta năp ngih rƀŭn, kruanh ăp n’gâng kan, nău kan an gĭt n’gor lĕ kơp uănh, joi ndơ hun hao tĭng nău kan, tĭng ntil nău. Ta năp nĕ, lŏ mir ƀư tơm tay đah rnoh hao jêng rlău 5%, hôm công nghiệp, ndâk ƀư n’hanh nău rhŏ dơi mĭn lah ăp ntil nău rgâl mhe gay trok gưl hao jêng hôm mô tŏng.

Ngoăy tâm âk nău uĕh dơi mpŏng kâp lah nău kan công nghiệp nhôm. Tĭng wa Nguyễn Bá Út, Giám đốc N’gâng kan Công thương Lâm Đồng, ndrel đah nău ntrôl ngăch an prăk ntuh kơl nsum n’hanh dôh rklaih jêr jŏt an ăp nău nchrăp ƀư, âk ndơ ƀư công nghiệp khlay mbra an lăp pơk dŏng dâl tâm 6 khay n’hanh 9 khay, geh tay soan hao jêng an n’gor. “Lơ 9/7 he mbra geh nhôm duh, lơ 19/7 mbra geh tay nhôm mpơng n’hanh 26/7 tăch ndơ nhôm bôk năp. Ntil nău công nghiệp ƀa ƀă, aƀaơ rgum 14 ngih măy âk gưl geh tât công nghiệp nkret njêng tâm ăp nkual, rkum công nghiệp, lơn lah ta Bình Thuận ơm mbra an hăn dŏng tâm 9 khay, 12 khay. Aơ lah ăp ndơ dŭt khlay gay rgop an hao jêng”.

Yơn lah, âk đại biểu an lah mĭn di ndơ mhe lah nău ŭch. Nău khlay lơn lah an rnoh ndoh ndơ na nê̆ rgop bah tĭng nău nchrăp ƀư, tĭng nău kan đah nău ŭch hao jêng nsum, tă bah nĕ kơl nău ƀĭt joet ngăch lơn n’hanh geh ntŭk gay ngih pah kan ƀon lan đă groi nđôi ngăch ƀư tĭng.

N’glôn jêh rơh tâm nchră, Groi Bí thư N’gor ủy, Kruanh HĐND n’gor Lâm Đồng Lưu Văn Trung lah rjăp, mông nar hôm ƀa ƀă bah năm mô âk, yor rĭ knŭng ăp nău nchrăp ƀư ơm geh ndơ n’hanh khlay hao âk mhe dơi rgop na nê̆ tâm nău rƀŏng hao jêng. “Ăp nău nchrăp ƀư geh dâl ndơ gay rgop an hao jêng lah ăp nău nchrăp ƀư ŭnh nar, nău nchrăp ƀư thủy điện hôm mô tŏng trong rse ri ntuh kơl jêh lah pơk điện, ngih măy nhôm ri bah aƀaơ tât dŭt năm nkra njêng geh ndâng âk tấn mbra an luh hao jêng. Gâp đă an geh du trong ƀư dŭt na nê̆ tĭng ngih măy, tĭng nău nchrăp ƀư”.

Nău mbơh bah ngih rƀŭn Lâm Đồng lah đŏng nău đă nsum n’gluh an đah âk ntŭk Tây Nguyên aƀaơ hin: ŭch geh nău rƀŏng hao jêng âk ri ăp nău nchrăp ƀư an hăn ndrel ngăch ƀư na nê̆, ăp ndơ ƀư an ơm luh ndơ, ăp nău kan an mĭn kloh tâm rgop bah nơm. Knŭng rnôk ăp n’hâm soan hao jêng dơi rgâl geh ndơ n’hanh khlay na nê̆, nău rƀŏng hao jêng 2 rnoh mrô mơ geh ntŭk gay ƀư rgâl tâm năm 2026.