Tĭng nău mbơh bâh UBND n’gor Đăk Nông, nău sŏk dŏng, nkret ƀư n’hanh dŏng quặng bô xit ta n’gor dơi geh mbơh tơih lĕ geh 17 năm yơn tât aƀaơ mơ geh rlu tay ta ntil ndơ alumin dơm, ê hŏ geh nhôm n’hanh ndơ ba kơi tă nkret ƀư nhôm. Nău ntuh kơl rdâk njêng ăp nău kan, nău nchrăp kan tâm ban kơt dăn nău ntrŭnh uănh nđôi, ntuh kơl ăp nău kan ta n’gor lĕ geh kŏ văk da dê yor geh tât nău nchrăp ƀư bô xit . Thủ tướng Chính phủ ntĭm đă ăp n’gâng kan, ntŭk kan geh tât mbơh ôp nău yơn tât aƀaơ ăp nău kŏ văk, mô dơi ê hŏ geh doh rklaih na nê̆. Tĭng nău mbơh wa Hồ Văn Mười, kruanh UBND n’gor Dăk Nông, bô xit an geh uănh n’hêl lah du ntil ndơ trôm neh ntoh lư n’hanh geh nău pah kan an tâm di. Đăk Nông dŭt ŭch geh nău tâm rgop bâh ăp n’gâng kan, ntŭk kan gay ma dơi rgâl nkra Luật Khoáng sản ta rơh rƀŭn nchră Quốc hội tât tay. Ntoh ngơi ta rơh pah kan, wa Trương Thanh Hoài, groi kruanh n’gâng kan Công thương an gĭt, đah ăp nău jêr, kŏ văk n’gor dăn đă, n’gâng kan công thương kơp dơn n’hanh mbra tâm rgop đah ăp n’gâng kan, ntŭk kan tât mbơh tơih đah Chính phủ, Quốc hội ơm doh rklaih nău gay ma n’gor geh dơi mbơh tơih ăp nău kan wăng sa, rêh jêng.