Mpôl pah kan bah n’gor Dak Lak hŏ tât khâl, mbah rhơn Tết Ban Chỉ huy tahen n’har bri n’gor. Wa Trương Công Thái, Groi kruanh UBND n’gor Dak Lak, Kruanh Ban rđău đă pah kan n’har bri n’gor, nchih nkah n’hanh rnê âk ăp nău dơi hŏ geh ma mpôl tahen n’har bri n’gor hŏ dơi mât njrăng nâp ƀư tơm neh dak, rnă njrăng n’har bri neh dak; lor nchrăp kan nsum lhăt, geh nău tam đah mpôl tahen mât njrăng n’har bri Campuchia tâm mât njrăng trong n’har bri, n’gâng ntăm n’har bri; cán bộ, tahen way mpư n’hao  nuih n’hâm dơn kan, rlău ăp jêr jŏt, wat jêh uĕh ăp nău dơn kan dơi jao.

Wa Trương Công Thái an gĭt, n’gor Dak Lak way uănh khlay, nta trong dơh gay Tahen n’har bri tĭng ƀư jăp nău dơn kan, nău dơi kan; nkre, dăn đă năm 2026, gưl ủy, chỉ huy ăp gưl tâm Mpôl tahen n’har bri n’gor ntik n’hao tay ăp nău dơi hŏ geh, mât nâp tâm rnglăp ndrăng nơm, n’hao săk tam pah kan, nchrăp dơn n’hanh wat jêh dơi lĕ rngôch ăp nău dơn kan tâm nô nău mhe.