Mô kâp nău ntrŭnh đă ma siƀŭt, mô kâp trok tâm đŏng, ăp gung trong ta xã Ia Hiao, n’gor Gia Lai dơi pơk hvi bah nău ŭch êng n’hanh nău tâm ban ŭch bah ƀon lan. Ntơm bah nău rong tĭng mét neh, rơih tĭng mpêr n’gar, nău nsing nơm đah Đảng n’hanh ƀon lan hŏ dơi bun dăp, njêng ăp njăr trong geh moh “Nău Đảng – nuih n’hâm ƀon lan”, pơk luh nău mpŏng hun hao mhe an nkual ƀon lan lôch n’glăp nsum.

Ăp nar bôk năm mhe 2026, nklang mông nar khuh n’gôr bah năm mhe Tây Nguyên, wa Trịnh Văn Bình, 69 năm deh, Kruanh Chi hội Mpôl tahen ơm thôn Đoàn Kết, xã Ia Hiao, n’gor Gia Lai, hŏ ti nơm nhŭp me nôp rơih mpêr bah rnăk nơm gay rong neh pơk hvi trong. Wa Trịnh Văn Bình nkoch, rong neh pơk trong lah nău rgop ngăn ngăn bah rnăk wâl ndrel kônh wa tâm thôn, gay rdâk njêng ƀon lan mhe.

“Tĭng trong nchrăp an ƀư pah kan ƀon lan mhe, gâp saơ dŭt tâm di đah nău đảng nuih n’hâm ƀon lan rnăk wâl gâp hŏ ŭch rong neh an ntŭk nchrăp ƀư ta ntŭk. Đah nuih n’hâm he yor an nsum mpôl, ƀon lan an ma he, trong nchrăp pơk trong dja dŭt dơh an kônh wa tâm thôn lah nsum n’hanh rnăk wâl gâp lah êng. Rsong hăn dơh ngăch, wăng sa tuch tăm roh đêt prăk dŏng ƀư, nsĭt geh wăng sa ri nău rêh ƀon lan dơi n’hao prêh”

Xã Ia Hiao, n’gor Gia Lai dơi njêng nsing ta nău n’glăp dơn ngoăy mât kơt ơm 3 xã: Ia Peng, xã Chrôh Pơnan n’hanh xã Ia Hiao, nkuâl Phú Thiện ơm. Ntrŏng ndơ dŏng ntung trong lah rêng đăt ndal gay hun hao wăng sa tâm năm kan 2025-2030, Đảng ủy, n’gâng kan xã Ia Hiao hŏ rgum rgŏ jă ƀon lan rong neh, rong ntŭk gay pơk hvi trong mbluh hăn tât thôn ƀon. Wa Đỗ Văn Điền, 63 năm deh, nuĭh ƀon lan thôn Đoàn Kết, rhơn nđơr an gĭt, dơi geh nău n’grŏ tĭng bah nuĭh ƀon lan jêng trong leo rong neh ƀư trong hŏ ngăch njêng du trong leo lam hvi.

“Lam ƀon lan n’grŏ tĭng, jêng dŭt rhơn nđơr, dơi geh nău dja lah nơm geh nău mât uănh bah Đảng n’hanh Ngih dak, bah n’gâng kan ta ntŭk n’hanh ăp gưl kruanh rđău kan jêng dŭt rhơn n’hao êng. Lĕ rngôch lah tă bah kônh wa tâm ban ŭch, du nuih n’hâm nsum suan, lĕ rngôch ndrel rgop suan ri mơ jêng geh du rup uĕh kơt aơ”.

Ntơm bah kêng dŭt năm năm 2025 tât aƀaơ dơm, xã Ia Hiao hŏ ƀư wat jêh 22 njăr trong, rgŏ jă 207 rnăk nuĭh ƀon lan rong rlău 38.000 mét vuông neh, rlău 6.200 mét vuông mpêr n’gar ndrel âk ndơ êng ƀa ƀă, đah lĕ rngôch rnoh khlay nchroh rlău 4,8 rmen prăk. Dŭt njrăng uănh khlay, tâm trong leo nê, cán bộ, đảng viên way lah mpôl kan hăn dâk leo lor bôk năp, ntĭt leo ma nău kan ngăn ngăn. Wa Siu Hiếu, Kruanh Ủy ban MTTQ xã Ia Hiao, nuĭh ƀon lan thôn Sô Ma Lơng A, an gĭt nău rong neh đah rnăk wâl păng bôk năp mâp mô đêt nău wĭ wĕ yor neh măt trong geh rnoh khlay têh. Yơn lah, gĭt kloh nău dơn kan bah nuĭh ƀư pah kan mặt trận, păng hŏ dâk ƀư lor:

“Saơ trong nchrăp dŭt di, săk nơm leo ƀư rong neh pơk hvi trong gay ntơm leo an kônh wa đŏng. Ntơm bôk năp geh jêr jŏt tâm rgŏ jă ur kon yor neh măt trong geh rnoh khlay aƀaơ nklăp 200 rkeh/m, yơn saơ dơi trong nchrăp di n’hanh săk nơm lah kruanh mặt trận xã ƀư pah kan nkoch trêng rgŏ jă kônh wa đŏng ri he ân lah nuĭh bôk năp ƀư lor gay an ăp rnăk ƀon lan hôm ƀa ƀă kơt tĭng. Lôch rnôk pơk hvi trong ri saơ lâng uĕh, geh n’hong dak sor hoch khĭ rnăk wâl saơ rhơn răm ngăn”

Ngăn an saơ, gay ntrôl dăng ƀư ntung trong, tơm prăk mpêt đê̆ bah xã Ia Hiao mô tŏng trok tâm đă ntrơn du. Bah năp ntul rlong nê, Đảng ủy xã hŏ ndơ̆ nău dơn kan hun hao ntung trong lăp tâm Nghị quyết, nkre sơch trong rdâk tay suan dăng nuĭh ƀon lan, sŏk nău tâm ban ŭch bah nuĭh ƀon lan ƀư sơn nâp. An saơ kloh lah âk njăr trong kơt Yên Phú 1, Yên Phú 2, Đoàn Kết, Sô Ma Lơng  ntơm bah trong hvi mô hŏ tât 3 mét, aƀaơ hŏ dơi pơk hvi tât 8 mét. Tâm nê, ngân sách Ngih dak n’hanh ăp tơm prăk tâm di ntop kơl 90%, nuĭh ƀon lan rgop 10% n’hanh lĕ rngôch rnoh hvi neh đă ntrơn du. Wa Phạm Văn Phương, Bí thư Đảng ủy, Kruanh HĐND xã Ia Hiao lah rjăp:

“Ntrŏng nău tâm pă kan lah ân kloh rvah n’hanh ntik n’hao lĕ nău khlay kan ntĭt leo lor bah rmôt cán bộ đảng viên. Nkre đah tâm pă nău dơn kan nê mpôl hên hŏ sơch ăp rnăk cán bộ đảng viên ƀư lor bôk năp. Thôn bôk năp tĭng ƀư lah thôn Sô Ma Lơng A, lôch nê tât ăp thôn êng ƀa ƀă, dŭt âk thôn hŏ ƀư dơi, mhe aơ mpôl hên hŏ ƀư dơi 22 njăr trong bah ăp tơm ndơ ndop nsum n’hanh ăp tơm ndơ ndăn geh gay ƀư an kônh wa ta xã”

Ăp gung trong mhe mô dơn pơk hvi gay rsong hăn, ma hôm pơk luh trong rƀŏng hun hao an nkual ƀon lan Gia Lai. Muh măt xã Ia Hiao ăp nar bôk năm mhe têh hvi, srăch uĕh, nău nsing nơm bah ƀon lan tâm n’gâng kan nâp dăng tay. Ntơm bah tâm ban nuih n’hâm bah Đảng n’hanh ƀon lan, du rlong n’hâm rêh mhe dôl ring lam, nâp jong n’hanh dăng kuâng nchih tay ăp nău nkoch uĕh mpeh ƀon lan mhe ta dor yôk Gia Lai./.