Ngoăy tâm âk doanh nghiệp hăn lor tâm nkret njêng jru hvi ta Dak Lak lah Công ty cổ phân Cà phê An Thái, way nkra njêng tăch n’gluh cà phê môi, cà phê rlăy wâr uĕh kah n’hanh cà phê dak toh 3 tâm 1. Doanh nghiệp aơ lĕ ntuh kơl an ndoh ndơ mhe, ký ton rwăt cà phê rlăy bah ăp hợp tác xã, ndâk ƀư trong tâm rgop bah mât tăm tât nkret njêng jêng trong khlay nâp nâl tâm lŏ mir. Wa Nguyễn Xuân Lợi, Tổng Giám đốc công ty nkoch:

Uănh khlay tât ăp trong mkra nkret njêng jru hvi n’hanh tâm nĕ lah rjăp nău ƀư tơm nkô̆ nău tâm rgoptrong, yor geh nău tâm rgop trong du trong rjăp tâm di ri mât uĕh nău ƀư tơm gay jêng du nău khlay bah ndơ nsum.

Đah Công ty TNHH MTV Minudo Farm-Care, nkual ƀon têh Buôn Ma Thuột, n’gor Dak Lak, ntơm bah rnôk ndâk njêng lĕ săch hun hao cà phê uĕh kah âk, nkret njêng ndơ rhŏ an tăch n’gluh. Rlet rlău âk jêr jŏt, tât aƀaơ, công ty lĕ dơi geh âk nău dơi têh rnôk ăp mbŭih ndơ cà phê dơi âk nuĭh năch Nhật Bản joi rwăt. Wa Lê Đình Tư, Giám đốc công ty uănh lah:

Nĕ lah du nău cách mạng dŭt têh đah Việt Nam tâm lôch trong hăn 6 năm hôm. Tât aƀaơ, rlău ma nău tăch cà phê rlăy rih he ƀư geh ăp ndơ bôk n’glêh dŭt. Pơng hao khlay dŭt âk, đêt ngăn lah hao rlău 2 tơ̆ nkôp đah tăch ndơ tăch rgâl n’hanh tăch ndơ rlăy, he geh dŭt âk dơi đă he an nsrôih âk lơn tay.

Dăch aơ, ndơ cà phê moh MISS EDE lĕ tăch n’gluh container cà phê kĭn jêng ndơ bôk năp an ntŭk tăch Hoa Kỳ. Gay dơi geh nău aơ, doanh nghiệp lĕ tŏng lĕ rngôch ăp nău tâm di kloh uĕh bah ntŭk tăch jêr nuih. Wa Hoàng Danh Hữu, Giám đốc ƀĭt joet Công ty TNHH Tăch rgâl ndoh ndơ lŏ mir EDE an lah, ăp doanh nghiệp ta Dak Lak geh dŭt âk nău dơh rnôk geh ơm ndoh ndơ, nău ŭch ƀư đăp mpăn uĕh kah ndơ tŏng ăp mro n’hanh ƀư geh âk ndơ moh êng. Nău aơ hôm rgop kơl doanh nghiệp dôh rklaih jêr jŏt mpeh tơm prăk ntuh kơl:

Prăk lah du nkô̆ nău khlay đah lĕ rngôch ăp doanh nghiệp. Yơn lah nĕ mô di nkô̆ nău khlay ngăn. Yor, rnôk he geh du nău dơh tâm rlong nĕ mpeh nkual tăm mô lah mpeh năl ndơ moh êng ri he dơi dŏng pơng gay rgŏ jă prăk. Rnôk uĕh kah lĕ đăp mpăn, nkual tăm nâp nâl lĕ dơi năl n’hanh khlay ndơ moh êng lĕ dơi bônh nuĭh dŏng. Ri năch bah năp n’hanh kâp ndơ trok prăk bah kơi. Rnôk he geh ăp nău dơh nĕ ri mô ir knơm kâp tâm prăk.

Gay ntrôl nkret njêng jru, Dak Lak lĕ geh âk nău kơl an wăch rgum doanh nghiệp ntuh kơl an ntil nău aơ. Bah năm 2016 tât aƀaơ, n’gor lĕ ŭch dơn nău ntrŭnh ntuh kơl an 20 nău nchrăp ƀư nkrte njêng cà phê, đah dĭng lĕ prăk ntuh kơl rlău 4.000 rmen prăk, geh n’ăp doanh nghiệp tâm dak n’hanh dak bah dih. Êng năm 2024, UBND n’gor lĕ uănh ntil ndơ nău nchrăp ƀư khlay wăch rgum ntuh kơl bah n’gor tât năm 2025, geh 36 nău nchrăp ƀư ăp ntil, tâm nĕ ntil nău lŏ mir n’hanh nkret njêng ăp ndơ lŏ mir geh 8 nău nchrăp ƀư, dĭng lĕ rnoh ntuh kơl bơi 1000 rmen prăk. Wa Nguyễn Thiên Văn, Groi Kruanh UBND n’gor Dak Lak an gĭt:

Mpôl hên ƀư tĭng tay ƀư nkret njêng jru hvi, nsrôih bah 15-20% ndơ cà phê dơi nkret njêng jru hvi. Tâm rnôk mbơh ƀư, mpôl hên mbra rgum tâm ăp rkum, nkual công nghiệp, gay kuăl jă ăp doanh nghiệp wăch rgum an nkra njêng ta ăp rkum, nkual công nghiệp bah n’gor. Bah nĕ nkret njêng jru hvi đah ăp ndơ lŏ mir bah n’gor n’hanh tăch n’gluh ƀư hao khlay an nuĭh ƀon lan kơt ăp doanh nghiệp, tâm di nău ŭch hun hao wăng sa rêh jêng ta ntŭk.

Lah n’gor geh rnoh neh n’hanh rnoh ndơ cà phê bôk năp Việt Nam, đah 212.000ha, rnoh geh ndơ rlău 520.000 tấn/năm, yơn rnoh cà phê dơi nkret njêng jru hvi gay rhŏ an tăch n’gluh ta Dak Lak hôm e đêt. Rmeh tâm ntil nău, nău kan ndoh ndơ aơ hôm e dŭt âk. Nău kơl lĕ geh, ăp trong hăn mhe lĕ dơi luh, nsing nơm mbra geh tay âk nuĭh ntuh kơl an Dak Lak n’hao prêh nău khlay an ndơ lŏ mir têh âk, rgop ƀư tĭng nău rƀŏng hao jêng nâp nâl tâm ăp năm tât.