VOV4.M’nông- Ôi nar 20/7, ta nkuăl ƀon têh Hồ Chí Minh lĕ geh nkhôm ndal an 150 rkeh prăk an Nguyễn Việt Phong kon hoc nti jrô 12, ngih nti THPT chuyên Lê Hồng Phong, 1 ngoăy 4 kon hoc geh huy chương vàng ta rơh tâm rlong Olympic Hóa học lam ntur neh năm 2022. Wa Nguyễn Văn Hiếu, Giám đốc ntŭk kan ntĭm n’hanh nti nkuăl ƀon têh Hồ Chí Minh an gĭt, lĕ bâh jŏ nkuăl ƀon têh Hồ Chí Minh mơ geh kon hoc geh nău dơi têh kơt nĕ. Aơ lah nău nsrôih bâh ăp oh tâm ban kơt rnăk vâl, ngih nti n’hanh nai nti lĕ ntĭm nti. Wa Hiếu ŭch Nguyễn Việt Phong an geh n’hao tay nău dơi kan bâh nơm gay ma ƀư lôch nău kan, ntop kan âk lơn tay an nkuăl ƀon têh n’hanh ngih dak. Nguyễn Việt Phong lah ngoăy tâm âk kon hoc bôk năp mbra geh dơn prăk nkhôm đah rnoh khlăy 200 rkeh prăk an kon hoc, học viên geh huy chương vàng ta ăp rơh thi Olympic lam ntur neh. Rơh tâm rlong Olympic Hóa học lam ntur neh IChO 2022 geh ƀư ta Trung Quốc. Mpôl kan tâm rlong ngih dak Việt Nam tât râng 4 nuĭh. Nău geh lĕ 4 oh geh huy chương vàng da dê.

        Nuĭh rblang: Thị Đoắt