Bí thư Thành ủy Nkual ƀon têh Hồ Chí Minh Nguyễn Văn Nên mhe ƀư tơm rơh hop đah Ban rđău đă đah ăp tiểu ban nchrăp nkah ndray 50 năm Nar Rklaih luh miền Nam, dơn ngoăy neh dak. Rơh hop gay ra uănh tay rnoh ngăch, ôp uănh săk blău pah kan nchrăp an ăp nău  kan rgum tơm kơt lễ nkah ndray, n’grĭng hăn tahen, ntroh hăn trong.

Tât aƀaơ, nkual ƀon têh hŏ ƀư lôch jêh 8 rmôt nău kan têh, tâm nê geh âk nău kan khlay kơt tâm nchră mâp măt cán bộ kruanh rđău kan ơm, bôk nău kan njroh mprơ “Đất nước trọn niềm vui”, măng hòa nhạc “Bản giao hưởng hòa bình”…wa Nguyễn Văn Nên đă lĕ rngôch cán bộ, công chức ntrŏng nuih n’hâm “Ƀư lĕ nău kan mô lĕ mông”, tơh nuĭh, tâm pă nuĭh tơh gay đăp mpăn rnoh ngăch n’hanh săk blău ƀư nău kan nkah ndray. Măng 25/4, ta trong Lê Duẩn, Quận 1, Nkual ƀon têh Hồ Chí Minh ƀư rơh kơp dơn n’grĭng tahen, ntroh hăn trong gưl neh dak lor bôk năp nchrăp na nar lễ 30/4 bơi tât.