VOV4.M'nông: Nar 4/8, ta nkual ƀon têh Hồ Chí Minh ntơm pơk lăp tâm rlong Liên hoan phát thanh lam dak tâl XV năm 2022. Wa Đồng Mạnh Hùng, Kruanh Ban Thư ký Biên tập, Tổng Thư ký Liên hoan phát thanh lam dak tâl XV an gĭt, aơ lah rơh liên hoan geh rnoh nuĭh ăp n'gor râng dŭt âk, lĕ rngôch 63 n'gor nkual ƀon têh n'hanh âk đơn vị bah Radio nău ngơi Việt Nam. Aơ lah năm geh rnoh nău nchih râng dŭt âk, đah rlău 500 nău nchih. Ăp nău nchih dơi lăp tâm rlong dơi rnê dŭt âk, hŏ mpơl dơi khuh n'gôr bah nău rêh aƀaơ. Ntoh lư lah ăp nkô̆ nău geh tât nău ndơ̆ Nghị quyết Đại hội Đảng lam dak tâl XIII tâm nău rêh, rơh rdâng lơh nuh srê COVID-19, ăp nkô̆ nău dâk hao tay n'hanh hun hao wăng sa. Lơn lah geh dŭt âk nău nchih nkoch mpeh nuĭh uĕh kan uĕh. Aơ lah ăp nău dơi bôk năp bah Liên hoan phát thanh lam dak rơh dja. Ntŭk mhe tâm Liên hoan Phát thanh năm aơ lah Ban Tổ chức n'glêh an tâm rlong n'hanh ntăm an ndơ nkhôm rnê bâr uĕh, gay năl saơ n'hanh mpư rnê ăp nuĭh ngơi/nuĭh tơm leo bôk nău ngơi geh bâr răk, pơk ƀoh nău ngơi uĕh blău; ntăm an ndơ nkhôm rnê an 2 ntil: Kỹ thuật rdâk njêng uĕh blău n'hanh ntil ndơ dŏng jâng nsing mbrô.

Tâm rơh ƀư bôk nau kan Liên hoan phát thanh lam dak tal 15, Radio nau ngơi ƀon lan nkuăl ƀon têh Hồ Chí Minh dôl ƀư nau mpla n’hơ “Nau dơi geh jêng bah văng sa rêh jêng nkuăl ƀon têh Hồ Chí Minh” ndrel “Nau geh dơi hun hao bah Radio nau ngơi ƀon lan nkuăl ƀon têh”. Rơh mpla n’hơ “Nkuăl ƀon têh Hồ Chí Minh blau mhe, hun hao, ueh lăng” mpla n’hơ 60 păng rup ndrel âk nau ƀư kan văng sa ntoh lư, nkoch mbơh ăp ntil mpeh nau hun hao văng sa, chính trị, văn hoá, rêh jêng bah nkuăl ƀon têh tâm ăp năm êp aơ. Nau mpla n’hơ “Nau geh hun hao bah Radio nau ngơi ƀon lan nkuăl ƀon têh Hồ Chí Minh” mbơh nkoch tât ăp nŭih uănh mpeh ăp ndơ ơm, rup ndah, ndơ dŏng ntoh nkoch rnôk njêng ndrel hun hao bah Radio nau ngơi ƀon lan nkuăl ƀon têh Hồ Chí Minh tâm rlau 40 năm ma aơ. Tâm nê geh bôk nau kan leo nau ueh bah Radio nau ngơi ƀon lan nkuăl ƀon têh Hồ Chí Minh kơt: Nau ƀư ca nhạc Làn sóng xanh, bôk nau mprơ cải lương Bông lúa vàng, nau nkhôm rlong ndeh vah jâng Nam kỳ Khởi nghĩa...Tâm rnôk mpla n’hơ, hôm geh âk ndơ ơm, ndơ dŏng máy móc ƀư nau kan bah ăp phóng viên, biên tập viên Radio VOH bah ăp rơh./.

Nuĭh rblang: Điểu Thân n'hanh H'Thi