Tĭng nău mbơh bâh rnâng kan mât uănh nău ntuh kơl rdâk njêng nău kan ƀon lan dŏng n’hanh công nghiệp n'gor Đăk Lăk, pe nău kan ta ăp xã Buôn Đôn, Ia Rvê n’hanh Ia Lôp lĕ geh ƀư lôch ta rlău 80% rnoh kan. Ăp nuĭh ntuh kơl dôl rgum ƀư lôch ntrŭp ƀư, ntrŭp ăp kĩ thuật, ndơ dŏng n’hanh nsrôih ƀư lôch ta năp lơ 6/8. Gay ma mât đăp mpăn nău ngăch kan, Rnâng kan mât uănh nău kan mbơh tơih rơh  ƀư bôk năp “70 nar măng mô rlu”, đă cán bộ uănh nđôi nău kan, N’gâng kan leo kan tahen n’gor Đăk Lăk lĕ geh đă mpôl kan tât kơl ƀư nău kan. Ndrel đah nĕ, Rnâng kan mât uănh nău kan dôl geh ƀư lôch săm ƀŭt ntuh kơl ngih nti Phổ thông nội trú ntuh kơl rdâk njêng nău kan ƀon lan dŏng n’hanh nău kan công nghiệp n’gor Đăk Lăk an gĭt. “Đah lĕ rngôch ăp ntŭk kan, lĕ rlet rlău nău jêr jŏt mpeh nău kan nuĭh kan, jêr mpeh trôk nar, jêr mpeh nău nchoăn rdeng gay ma tâm di đah nău ngăch kan nsum. Aƀaơ bôk năp lĕ geh 3 ngih nti lĕ lôch rlău 80% rnoh ăp nău pah kan. Đah nău kan kơt aơ rĭ mbra geh du đê̆ nău kan ta lơ 15/7 mbra ƀư lôch ăp nău kan, geh ăp nău ntrŭp ndơ kcheh nti, nsưng mpan. Mât đăp mpăn ngăch tĭng nău ntĭm đă bâh n’gâng kan Chính trị tâm ban kơt lah n’gor Uỷ, Hội đồng nhân dân n’hanh Uỷ ban nhân dân”.

N’gor Lâm Đồng lĕ dôl geh mbơh tơih nău kan rdâk njêng 5 ngih nti phổ thông nội trú bar gưl nti ta ăp xã n’har bri geh Quảng Trực, Thuận An, Tuy Đức, Thuận Hạnh n’hanh Đăk Wil, đah lĕ rnoh ntuh kơl rlău 1.140 rmen prăk. Ăp ntŭk dôl geh nsrôih ƀư lôch ăp nău kan di mô lah ơm lơn đah nău nchrăp, mât đăp mpăn ntŭk kan geh kơl ndơ  ntĭm n’hanh nti bâh bôk năm mhe.

Tâm nĕ, 2 nău kan ƀư ngih nti phổ thông nội trú bar gưl nti ta ăp xã n’har bri geh Quảng Trực n’hanh Thuận An dôl geh ntrôl ngăch. Tât aƀaơ,  nău kan ƀư ngih nti lĕ geh ntơm lôch ndơ bôk năp, ăp nuĭh  dơn kan lĕ n’hao nuĭh kan, ndơ dŏng, tâm pleh kan gay ma ƀư lôch ta năp lơ 15/8, ơm lơn 15 nar đah nău nchrăp. Wa Lê Thị Bích Liên, Giám đốc ntŭk kan ntĭm n’hanh nti n’gor Lâm Đồng an gĭt. “Ntŭk kan ntĭm n’hanh nti pah kan sŏng dăng đah xã dŭt âk tơ̆ n’hanh lĕ dơn ngoăy đah xã trong kan pă kon hoc n’hanh ntŭk kan lĕ ƀư lôch ntrong kan pă kon hoc nti. Mpeh năi nti ntŭk kan ntiưm nti n’gor lĕ mbơh nău  tâm nău pă biên chế bâh nkual bâh Bình Thuận n’hanh Lâm Đồng ntop an 2 ngih nti ta n’har bri”.

Nău ngăch ndăn ƀư lôch ăp ngih nti nội trú ta ăp xã n’har bri ta nkual Tây Nguyên mô dơn geh tâm di đah nău ŭch năp lor mpeh ndơ dŏng ntung trong an năm nti mhe, ma hôm nha mpơl nău mât kơl bâh Đảng n’hanh ngih dak đah nău kan ntĭm nti nkual n’har bri.