Nkah nau ntĭm bah Wa Hồ “ntŭk ŭch druh ndăm geh, moh nau kan geh druh ndăm”, đảng viên Trần Tiến (deh năm 1992) chuyên viên jrâu mât nau kan Sŏk-sổ, Thẻ, Bảo hiểm xã hội n’gor Dak Lak mbơh nau, ƀư ăp nau kan druh ndăm rƀŏng tât ăp nkuăl jêr bah n’gor. Nô âk tŏ nthoi đah ăp nau ƀư kan mât, rêng ăp nau khlay nau ơm yau bah rnoi mpôl đê̆ kơt nkra, rep ndrâm dak, n’hao nau mât ntŭk ntu gŭ âm ân ƀon lan; pă nklâm ndơ, kơl an prăk ntŭm nti tur chĭng ân nkuăl n’har bdri, Ndrel ma nê, nô Tiến hôm joi, ntrŭt dăng nau dŏng ntrơn rgâl mrô tâm nau ƀư kan, geh âk nau mhe, nau ƀư ueh gay kơl an nŭih dŏng, ƀư ăp nau dŏng kan trực tuyến, pơk trong nơih tẩmnôk dŏng ƀư nau kan bảo hiểm xã hội. Đảng viên Trần Tiến nkoch:

            ‘Gâp lah đảng viên mom, kŏ geh chi bộ pơk trong nơih gay ƀư du đê̆ nau kan mpeh nau rgum rƀŭn, geh nau dơi gay joi jru lơn du đê̆ nkô̆ nau kan ngăn bah nau ntĭm nti ndrel ƀư tĭng nau Wa. Gâp mro nsôih lôch n’hâm pah kan nsum, tâm nau ƀư nau kan ri gâp kơt tĭng Wa âk ngăn mpeh nuih n’hâm ŭch kan êng, mô rlu kơt tĭng gay ma n’hao nau dơi bah săk nơm”.

            Đah yuh Nguyễn Thuỳ Trang, deh năm 1992, Bí thư Đoàn Phường Ea Tam, nkuăl ƀon têh Buôn Ma Thuột, bol ma moh năm, moh kan yuh kŏ gĭt ƀư kloh nau kan bah nŭih cán bộ. 23 năm hŏ ƀư Groi Kruanh Mặt trận Tổ quốc phường mom ngăn bah Dak Lak. Ntơm rnôk ƀư nau kan Đoàn, yuh hŏ ƀưq 7 nau kan druh ndăm, ƀư âk nau kơl an tâm nau rêh, nsôih râng bonh đă druh ndăm hăn tahen, kơl an druh ndăm ndâk kan mhe, nthoi druh ndăm ƀư nau tâm n’ur, mât nau ơm ueh ăp rnoi. Bah nê, pơk nau nthoi, ƀư ueh nau kan bah druh ndăm tâm dâng, Yuh Nguyễn Thuỳ Trang, mbơh:

            ‘Bah ăp nau rgŏ jă ri kŏ kơt lah joi gĭt tât Wa Hồ ri săk gâp nơm kŏ kơt tĭng nti tâm Wa ăp nau blau tâm nau rêh, gơih tâm nau kan, nsôih ndrel mro leo ƀư rjăp ngăn nau kan bah săk nơm tâm nau ƀư nau kan geh jao tă bah gưl ba lơ. Ƀư nau kan nâp, ƀư ân tâm di ndrel tĭng nkô̆ nau bah ntŭk kan gay njêng luh nau tâm boh ueh ngăn đah Đảng đah ƀon lan ndrel tâm cán bộ đah đoàn viên, druh ndăm”.

            Kơp dơn nau nsôih, nau rgop bah đảng viên mom, Đoàn n’gor Dak Lak ƀư nau rnê 33 đảng viên mom ntoh lư tă bah ăp nkual, nkuăl têh, nkuăl ƀon têh ndrel ăp rmôt kan bah n’gor. Aơ lah ăp nŭih ntoh lư bah ăp nau kan, kơt: ntĭm nti, mĭn kan khoa học, hun hao văng sa, ndâk nau kan, nau kan đoàn-hội-neh dak-đăp mpăn, ndâk ƀon lan mhe ndrel mât ntŭk ntu. Geh rnê rnôk aơ, yuh Phạm Thị Thu Thảo, Bí thư Đoàn ngih săm ƀŭt THPT Buôn Hồ, nkuăl têh Buôn Hồ, n’gor Dak Lak nkoch:

            ‘Gâp saơ rhơn ndrel ntô̆ n’hao, tâm rach năm n’hao săk aơ đah gâp lah du hê đảng viên mon, du nŭih rđau kan đoàn ri gâp saơ nau kan bah nơm lah nŭih ƀư nau kan rjăp ngăn gay ndrel nau kơl an neh dak hun hao lơn”.

            “Ntŭk ŭch druh ndăm geh, moh nau jêr geh druh ndăm”-nau ntĭm bah Wa Hồ tă bah jŏ hŏ jêng nau leo ntrong kan ân âk đảng viên mom njêng nau kan ngăn. Ta Dak Lak, ăp nŭih đảng viên kơt Trần Tiến, Nguyễn Thuỳ Trang mô lah Phạm Thị Thu Thảo hŏ ndrel dôl ƀư rjăp nau kan leo trong bah nơm tâm ăp nau kan, tă bah nau kan nơm ƀư tât nau kan Đoàn, tă bah nau mât nau vay tât nau ntrơn rgâl mrô kơl an ƀon lan. Khân păng mô êng kơt Wa tâm nuih n’hâm kan, nau kơt tĭng ndrel ƀư ăp nau kan mĭn ƀư jêng nau kan ƀư n’hêl, ngăn, rêng nuih n’hâm rêh ueh, rêh geh nau dơi tâm ƀon lan.

            Nau kan rnê đảng viên mom ntoh lư lah rnôk gay Đoàn n’gor Dak Lak lŏ ndâk nuih n’hâm ƀư kan, nau nsôih tâm đoàn viên, druh ndăm, rgop nau ndâk njêng ăp ntŭk kan Đoàn nâp, dăng, ƀư ueh nau kan bah mom ndăm tâm nau ndâk ndrel mât neh dak. Ndâk Dak Lak nar lơn ma hun hao ueh, mhe, nâp./.