Ăp nar bôk khay 4, ta ntŭk ndranh nglăp ƀư mrô 2 (XL02) ta Nău nchrăp ƀư gưl 2 trong têh hăn ngăch Khánh Hòa-Buôn Ma Thuột, mông nar ndâk ƀư geh ndăn. Tĭng rmôt phung pah kan, kỹ sư ndrel âk măy mŏk, ndoh ndơ bah công ty Cổ phần ntuh kơl n’hanh ndâk ƀư Ntung trong Phương Thành dôl ndăn tuh bê tông n’gâng, rui ntung n’hanh tuh chay 2 bôk ntung. Nô Đỗ Đình Huấn, ƀĭt măy kuih rli trong an gĭt, tâm rnôk pring xăng hao khlay, nău dŏng măy mŏk dơi đă rjăp, tâm di gay ntêm nkrem prăk n’hanh đăp mpăn ngăn ƀư.

Oh nô nchrăp lor ntêm nkrem rnôk dŏng măy ri tâm di pơk ga, yơk choah an rĭng, mô an lât dăng ndal. Rnôk hăn nchoăt mbrơi, mât ga đăp mpăn, dêr ntrŭt ga ir hao pring xăng lơn. Ăp rnôk kâp ndeh rdêng, mô lah rlu ri nsĕt măy gay ntêm nkrem pring.

Tĭng wa Lương Công Lý, Giám đốc ƀĭt joet ndâk ƀư ndranh nglăp ƀư mrô 2, rnoh khlay pring hao âk n’hanh ntŭk tăch mpêt lĕ ƀư prăk dŏng măy mŏk hao âk, nkre hôm rnoh khlay ăp ntil ndoh ndơ kơt loih, xi măng, choih, lŭ hao tât 20%. Ta năp nău ngăn aơ, ntŭk kan lĕ nchrăp ƀĭt joet ngăch ntŭk tăch pring diesel n’hanh nkra rgâl trong nchrăp ndâk ƀư, gay đăp mpăn tŏng pring xăng n’hanh mât ngăch nău nchrăp ƀư.

Ntŭk tăch pring xăng n’hanh ndoh ndơ hao âk n’hanh khar mpêt, mpôl hên nchrăp joi tay ăp ntŭk pă tăch gay đăp mpăn ndâk ƀư. Nkre, ntŭk kan kơp uănh đŏng, rgum n’hanh kơl lor mbơh ƀư ăp ntil ndơ khlay kơt ndâk ƀư chay tuh trong, n’hanh chay ta ăp gưl trong khlay.

Mông nar ndâk ƀư ndăn dôl geh ta ndranh nglăp ndâk ƀư mrô 3, ta nău nchrăp ƀư gưl 2 trong têh hăn ngăch Khánh Hòa-Buôn Ma Thuột. Ndơ ndranh geh dĭng lĕ khlay nklăp 1.000 rmen prăk, geh 2 trong mŭr, trong ntung kơh n’hanh nklăp 2,5 km trong ndeh. Wa Trịnh Trung Lượng, Kruanh ntĭm rđău ndơ ndranh nglăp ndâk ƀư  03 an gĭt, bơi du khay bah năp, rnoh pring hao âk, ntŭk tăch geh rnôk khar mpêt doanh nghiệp mâp âk jêr jŏt. Bôl ndrĭ, ntŭk kan hôm e mât nklăp 250 phung pah kan, kỹ sư ndrel 100 măy mŏk, ndeh rklư gay đăp mpăn ngăch ƀư.

Aƀaơ tâm yan wai hô, trôk nar uĕh an ndâk ƀư jêng du nar ntŭk kan ŭch nklăp 4.000 lít pring diesel gay dŏng măy mŏk. Yor rĭ, tŏng wa Trịnh Trung Lượng, nău tŏng pring xăng đăp mpăn dôl lah nău mĭn ma ntŭk kan rgum mkra.

Rnoh khlay pring hao dŭt âk lŏ khar mpêt tay ƀư mpôl hên an nchrăp dŭt na nê̆. Mpôl hên lĕ nchrăp pah kan đah ăp ntŭk kan tăch gay nchrăm ndơ ơm, rwăt âk sĭt ntêm nkrem. Aƀaơ mpôl hên dôl nkrem 3 bồn têh bah 15.000 tât 20.000 lít pring diesel n’hanh dơi dŏng ndâk ƀư geh bah 1-1,4 khay.

Rdâk ƀư bah khay 6/2023 đah dĭng lĕ rnoh ntuh kơl bơi 22.000 rmen prăk, trong têh hăn ngăch Khánh Hòa-Buôn Ma Thuột dơi mpŏng kâp geh trong ntrŭt ntrôl an boăt nthoi nkual Tây Nguyên n’hanh duyên hải Nam Trung bộ. Tâm rnôk rnoh pring xăng hao âk, ăp nuĭh ndranh ndâk ƀư nău nchrăp ƀư lĕ nchrăp mbơh âk trong mkra ngăch gay đăp mpăn ngăch tĭng ntĭm rđău bah Thủ tướng Chính phủ./.