Tĭng nău ntrŭnh bâh UBND n’gor Quảng Ngãi, nău ntop tay rnoh kon hoc gay ma an tâm di nău ŭch nti bâh kon hoc lôch geh uănh nău dơi kan geh dơn nău kan bâh ăp ntŭk kan ntĭm n’hanh nti, mât đăp mpăn tâm di đah ndơ dŏng ndơ kan, mpôl nai nti n’hanh nău ŭch n’hao nău dơi ueh ntĭm nti. UBND n’gor Quảng Ngãi pă an Giám đốc ntŭk kan ntĭm n’hanh nti knơm nău geh uănh nđôi nău dơi geh dơn ăp ntŭk kan ntĭm nti gay ma ntrŭnh nău săch kon  hoc ntop tay na nê̆ an ăp ngih nti THPT n’hanh ntŭk kan ntĭm nti ƀa ƀơ, Nău săch kon hoc nti an geh ƀư na nê̆, kloh rjăp, di nău ntrŭnh n’hanh dŏng geh săk rnglăy ăp ntil ndơ dŏng, mpôl nai nti aƀaơ geh.

Wa Nguyễn Ngọc Thái, Giám đốc ntŭk kan ntĭm n’hanh nti n’gor Quảng Ngãi an gĭt, nău uănh năl naư mpŏng kan geh săch lăp nti geh knơm tĭng ăp nău ntrŭnh bâh Chính phủ, nkre lah kơp tĭng nău ngăn mpeh ndơ dŏng, jrô nti, ndơ kan n’hanh mpôl nai nti bâh ăp ngih nti. Năm nti mhe nơh, rnoh kon hoc lôch nti THCS hao đah ăp năm ba năp jêng nău ŭch lăp nti jrô 10 ngih nti ngih dak lĕ geh âk lơn đŏng.

Lôch geh mbơh nău geh săch kon hoc nti rơh 1, rnoh kon hoc ê hŏ geh săch nti ăp ngih nti ngih dak hôm nha âk. Ntŭk kan ntĭm n’hanh nti n’gor Quảng Ngãi lĕ geh uănh nđôi tay nău dơi geh bâh ăp ntŭk kan ntĭm nti, ngăn lah nău dơi jrô nti n’hanh rnoh nai nti tâm du jrô nti tĭng nău ntrŭnh bâh n’gâng kan ntĭm n’hanh nti, mbơh đă ntop tay rnoh kon hoc lăp nti. Wa Nguyễn Ngọc Thái, Giám đốc ntŭk kan ntĭm n’hanh nti n’gor Quảng Ngãi an gĭt tay. “Aƀaơ hôm 4 ngih nti ê hŏ geh tŏng kon hoc tĭng nău mpŏng kan geh mbơh jao geh ngih nti  Phổ thông Dân tộc Nội trú Măng Đen; ngih nti Trung học phổ thông Đinh Tiên Hoàng (nkuăl Sơn Tây ơm), ngih nti Trung học phổ thông Tây Trà (nkuăl Trà Bồng ơm) n’hanh ngih nti Trung học cơ sở n’hanh  Trung học phổ thông Phạm Kiệt (nkuăl Sơn Hà ơm). Đah ăp ngih nti aơ, ntŭk kan ntĭm n’hanh nti n’gor mbra geh dơ nău ŭch rŏng ntop tay n’hanh geh uănh năl tay tĭng nău way sŏk điểm bâh prêh jur dêh gay ma mât đapw mpăn tŏng nău săch lĕ geh UBND n’gor pă jao. Nkre lah, ntŭk kan ntĭm n’hanh nti lĕ geh dơn ngoăy  đah ăp ngih nti gay ma ƀư tĭng nău săch nti ntop tay.

Nău săch ntop tay bơi tât 2 rbăn rnoh kon hoc lăp nti jrô 10 ngih nti ngih dak mât mô dơn tâm di đah nău ŭch nti bâh kon hoc ma hôm nha ntop n’hao nău ueh rnoh nuĭh kan, mât đăp mpăn rơh nkhêp geh dăch đah nău ntĭm nti an kon hoc tĭng nău ntrŭnh Nghị quyết mbrô 71 bâh n’gâng kan chính trị mpeh rgâl mhe nău kan tơm, lĕ rngôch tâm nău ntĭm nti, tâm di đah nău ŭch hun hao bâh neh dak ta rơh mhe.