Quảng Ngãi geh nău dơh uĕh hun hao tơm dak si, cà phê, si gle n'hanh tui ka. Yơn lah, nkra njêng hôm e tâm pă êng, tâm rgop đah nuĭh ƀon lan n'hanh doanh nghiệp mô hŏ rjăp, nău dơi nkret njêng jru hôm e đêt. Yor kơt nê̆, lvang năm 2026–2030, n'gor rƀŏng trong ƀư tay nkra njêng, jêng rêng rnoh khlay, n'hao uĕh ndơ n'hanh pơk hvi ntŭk tăch rgâl. Ntoh ngơi ta rƀŭn nchră, wa Võ Văn Hưng, Groi kruanh n'gâng kan tuch tăm mât rong n'hanh ntŭk gŭ rêh dăn đă n'gor Quảng Ngãi rgum hun hao wăng sa bri âk ntil nău geh ndrel đah tơm dak si, tuch tăm ndơ tăch khlăy nâp nâl ndrel đah nkret ƀư n'hanh wăng sa tui ka ueh mhe. Wa Võ Văn Hưng an lah, đah tơm dak si, n'gor Quảng Ngãi an geh rdâk njêng rnoh khlăy bâh mât rbăy ntil, hun hao ntil tât nkret ƀư jru n'hanh rdâk njêng nău ntơ: "Mô dơi knŭng pơk hvi rnoh neh bri, tăm mô lah tăch ndơ ơm geh. Nău ŭch lah hun hao công nghiệp dak si, njêng luh ăp ndơ geh rnoh khoa học âk, geh săk ntơ lư n'hanh rnoh khlay wăng sa têh".

Ngoăy tâm ăp ntŭk kol dơi doanh nghiệp nkoch ta rgum nchră lah mô tŏng nkual tăm rgum. Wa Phan Văn Hồng, Giám đốc Nông trường nkra njêng, Công ty Cổ phần nkret njêng ndơ tuch tăm Sao Mai an gĭt, năm 2026, doanh nghiệp tâm rgop đah bơi 120 ntŭk tăch, hợp tác xã n'hanh rnăk ƀon lan tăm rlău 581 héc ta chanh rse n'hanh prit. Rnoh ndơ geh rvăt nklăp 22.000 tấn, tâm rnôk nău ŭch geh bah ngih măy nklăp 75.000 tấn ăp năm.Wa Phan Văn Hồng dăn đă n'gor Quảng Ngãi ntop kơl droh rklaih jêr jŏt mpeh rnoh neh, hun hao nkual tăm, ntung trong n'hanh pă rnoh mbrô nkual tăm:  "Kanŭng geh neh, geh neh mơ geh nkual tăm, mơ dơi rdâk njêng n'hanh ƀư dơi công nghệ mhe".

Ndrel uănh khlay tât nkô̆ nău dja, wa Nguyễn Trung Kiên, Groi Tổng Giám đốc Tổng Công ty Cà phê Việt Nam dăn đă, ta ntŭk ntop kơl ôp uănh sam ƀŭt sam tra pháp lý mpeh neh ntu, ntrŏng năl ntŭk ntô ntŭk tăm, mkra nău tâm pit n'hanh ndâk ƀư dữ liệu rhŏ dŏng joi tu tơm:  "Dăn đă UBND n'gor Quảng Ngãi ntĭm rđău ăp ntŭk kan, n'gâng kan n'hanh n'gâng kan ƀon lan gưl xã tâm rgop pă mbơh nău lư mpeh nău nchrăp ƀư, nău ngăn dŏng neh n'hanh ntung trong. Tĭng nĕ, doanh nghiệp mbra hăn uănh năl, uănh năl nkual tơm tăm tâm di, der bah nău tăm tơm rlŭ nău nchrăp ƀư, đăp mpăn nău dơi n'hanh nău geh tâm di bah nuĭh dŏng neh" .

Ta trong kan wăng sa dak lêng, wa Trần Đình Luân, Cục trưởng Cục Thủy sản an lah, ndơ geh ƀư n'hanh rnoh âk nkret njêng tui ka bah Quảng Ngãi mô hŏ tâm di đah nău geh. N'gor ân dăp rgum tay mpôl duk, ntrŭt nsôr rgâl nău kan joi ka mô săk rnglăy, n'hao uĕh mât prăp jêh joi ka n'hanh wăch rgum doanh nghiệp ntuh kơl nkret njêng jru. Đah mât tui ka, ân ntrŏng kloh ntŭk mât dak lêng, joi geh nău dơi 180 n'glău dak bât, nkre hun hao ăp ndơ geh ƀư ntĭt êng nkre đah mât njrăng tui ka n'hanh pâl nđaih sinh thái. Wa Trần Đình Luân lah:  "Ŭch kuăl jă doanh nghiệp lăp mât tui ka ri n'gor ân ntĭm dŭt kloh nkual dja mât dơi, nkual dja hun hao dơi ri mơ geh doanh nghiệp lăp dơi. Bah meng nê rƀŏng tât nkô̆ nău ntil, mât, sơ chế n'hanh nkret njêng".

Wa Hồ Văn Niên, Bí thư N'gor ủy Quảng Ngãi an gĭt, lôch n'glăp nsum n'gor Quảng Ngãi n'hanh n'gor Kon Tum, ntŭk geh ntŭk hun hao mhe, rgum nău dơh uĕh dak lêng miền Trung n'hanh bri neh têh hvi Tây Nguyên. Aơ lah ntŭk nsing gay buăt nthoi nău dơh uĕh mpeh công nghiệp, ndrâm dak lêng, tui ka, tuch tăm êng ƀa ƀă, dak si n'hanh bri nđĭr uĕh. Wa Hồ Văn Niên ndơ̆ nău:  "Nkô̆ nău ndơ̆ luh mô knŭng lah mât uĕh ăp ndơ ơm geh, ma hôm ân dăp rgum nkra njêng, pơk hvi tơm ndơ, n'hao rnoh khlay n'hanh đăp mpăn hun hao tâm ban đah wăng sa, rêh jêng kon nuĭh đah mât njrăng ntŭk gŭ rêh".

Rƀŏng tât năm 2045, n'gor Quảng Ngãi rƀŏng tât hun hao tuch tăm mhe, jêng ntŭk nkra njêng dak si, nkret njêng si n'hanh hun hao wăng sa dak lêng ta jâng wăng sa uĕh nđĭr, wăng sa tâm pleh.