Rƀŭn nchră dơi ƀư gay mât uănh n’glôn jêh mrô 17 bah Bộ Chính trị n’hanh ăp nkô̆ nău bôk năp tâm Nău rgop an tâm nchră nchrŏng trong ndâk njêng pháp luật năm kan Quốc hội khóa 16; nkre tâm rgâl, tâm nchră mpeh nău đă, nkô̆ nău trong nchrăp n’hanh ăp trong mkra ƀư tĭng, đăp mpăn ngăch n’hanh uĕh nâp.

Bôk nău rgop an tâm chră mĭn 6 nău mĭn êng ntĭm rđău, 6 nău đă đah trong ndâk njêng pháp luật năm kan quốc hội khóa 16, khlay lah: Đăp mpăn trong kan ndâk njêng, jêh trong pháp luật đah nău rđău lĕ rngôch, rjăp bah Đảng; ngăch rgop an tŏng ăp, di nău ntrŭnh, trong hăn bah Đảng. Mĭn njêng nkra rgâl lĕ rngôch n’hanh rgop na nê̆ tay Hiến pháp; ndâk njêng tŏng ăp pháp lý nkra rgâl lĕ rngôch ăp ntil nău wăng sa-rêh jêng. Bôk nău rgop an tâm chră mĭn lah nău kan mĭn njêng lĕ rngôch, nkra rgâl lĕ rngôch Hiến pháp năm 2013 tâm di đah nău ngăn, đă hun hao neh dak tâm lvang mhe; nkre, mĭn lah 8 trong nchrŏng ndâk njêng pháp luật khlay hăn ndrel đah 171 nău kan an ƀư tĭng tâm năm kan Quốc hội khóa 16.