Đah bôk nău “Ntrŭt ntrôl kan ndrel wăng sa, pơk hvi dơi ntuh kơl ăp ding”, rƀŭn nchră geh tât râng bah 400 doanh nghiệp 2 dak rgum tâm ăp ntil nău kơt: công nghệ ndơ sa n’hanh dak ngêt, ICT, công nghệ kloh rih, ŭnh nar nkra njêng, viễn thông, ndâk ƀư ngih wâl, cơ khí, prăk kaih, công nghiệp mât njrăng bri dak, dak si, rnă njrăng mạng, bảo hiểm tăch n’gluh, nău rhŏ pháp lý... Ntoh ngơi ta rƀŭn nchră, Thủ tướng Cộng hòa Slovakia mĭn lah nău tâm boh đah 2 dak dơi ndâk njêng ta trong kan ndrel jŏ jong n’hanh nău rƀŏng tơm khlay bah rơh khâl aơ dơi geh ăp tâm ton na nê̆ n’hao tâm boh hao kan ndrel têh hvi.

Thủ tướng Robert Fico lah rjăp, Việt Nam lah băl têh ngăn bah Slovakia ta Đông Nam Á. Slovakia mpŏng ŭch n’hao tăch n’gluh n’hanh mbơh ƀư ăp nău nchrăp ƀư na nê̆ ta Việt Nam, tâm ăp ntil nău khlay geh: Mât njrăng bri dak, cơ khí, rnă njrăng mạng, công nghiệp ô tô n’hanh dak si. Ta rƀŭn nchră, Thủ tướng Lê Minh Hưng an gĭt di rơh khâl Việt Nam rơh aơ, 2 Thủ tướng lĕ mbơh an nău mbơh nsum mpeh nău n’hao tâm boh Việt Nam - Slovakia hao kan ndrel têh hvi; tă bah nĕ ndơ̆ Việt Nam jêng dak bôk năp ta Đông Nam Á geh tâm boh kan ndrel têh hvi đah Slovakia; ndơ̆ nău mbơh têh dăng mpeh nău nsrôih bah 2 dak gay geh n’hâm soan dăng n’hanh pơk luh ntŭk ntô têh hvi mhe gay 2 dak ndrel lăp tâm lvang hun hao mhe prêh lơn, rup gui têh lơn, jru hvi lơn.