Nthoi tay rơh rƀŭn 44, kêng măng 25/4, Ủy ban Thường vụ Quốc hội tâm nchră mpeh nău nchrăp Nghị quyết mpeh mô sŏk prăk nti an kon hŏk mầm non, phổ thông ngih sam ƀŭt ngih dak bah năm nti 2025-2026. Mbơh ƀư N’glôn jêh bah N’gâng kan Chính trị lơ 1/3/2025 mpeh nău mô sŏk prăk nti an kon hŏk mầm non n’hanh kon hŏk phổ thông, Nghị quyết mbra ntop tay ăp nuĭh dơi mô sŏk prăk nti tâm ngih sam ƀŭt ngih dak, ntop kơl prăk nti an kon hŏk ngih sam ƀŭt bah dih.

Tĭng rnoh kơp năm nti 2023-2024, aƀaơ lam dak geh 23, 2 rkeh kon hŏk. Dĭng lĕ nău ŭch prăk tơm prăk ngih dak an trok kơp êng nklăp 30,6 rmen prăk. Dŭt âk ủy viên tâm ban ŭch nău khlay ntrŭnh an Nghị quyết, mpơl nău di bah nău kơl tâm ban gĭt tât ntĭm nti n’hanh lĕ đah nău kan bah Ngih dak đah nuĭh nti, mât uănh an rơh kon se n’hanh đăp mpăn nău rêh jêng. Yơn lah, ăp ủy viên đă an uănh lah na nê̆ dơi tâm pă tơm prăk bah ăp ntŭk, ngăn lah ăp ntŭk geh wăng sa rêh jêng jêr jŏt gay đăp mpăn ƀư tĭng nău kơl aơ.