VOV4.M’nông: Lơ 11/7/2022, Nŭih ntoh măt bah dak Nhật Bản pah kan ta Việt Nam hŏ pơk săm ƀŭt nchih nkah Thủ tướng ơm Nhật Bản Shinzo Abe. Tổng Bí thư Nguyễn Phú Trọng hŏ njoăl nkah chang Kruanh Đảng Dân chủ Tự do, drâu Thủ tướng Nhật Bản Shinzo Abe. Kruanh dak Nguyễn Xuân Phúc ndrel Thủ tướng Chính phủ Phạm Minh Chính hŏ ntoh măt rđau kan gưl prêh Việt Nam tât chang, nchih tâm ndrôm săm ƀŭt tâm Ntŭk kan ntoh măt bah Nhật Bản ta Việt Nam.

Rđau kan gưl prêh Việt Nam ntoh nau rngot klâng ngăn ndrel njoăl nau tâm pă nau rngot ngăn bah Đảng, Ngih dak ndrel ƀon lan Việt Nam tât Đảng Dân chủ Tự do, Chính phủ, ƀon lan Nhật Bản ndrel rnăk vâl drâu Thủ tướng Abe Shinzo. Rđau kan gưl prêh Việt Nam ntoh nau ŭch rđau kan, ƀon lan Nhật Bản ndrel rnăk wa Shinzo Abe ơm rlet rlau nau rngot, nau roh hoach têh aơ, ŭch bar dak mât ndrel hun hao lơn tay nau tâm boh ueh lăng Việt Nam- Nhật Bản./.

Nŭih rblang: H’Thi