Tĭng nău mbơh, tâm bah ri aơ mpôl cảnh sát hŏ nsrôih mât njrăng uĕh, n’hao nău dơi tam pah kan nhŭp kân, rmal gŭ ndrung, đăp mpăn rnă njrăng ta 54 ndrung krŭng đah 178 ntŭk tâm pă krŭng. Bah meng nê, ăp mpôl kan hôm ƀư jăp pah kan nsŏng kơl, tĭng ƀư pah kan an luh ndrung ơm, mƀơk luh bah năp nar ton geh nău nkol.

Tâm 2 năm aơ đah rlău 32.000 nuĭh an luh ndrung ơm yơn rnoh âk nuĭh plơ̆ tay nău tih dŭt đêt (0,06%), mpơl nuih n’hâm rŏng nuĭh, uĕh di bah trong tĭng nău rêh he, nkre mpơl kloh lôch geh nău dơi rđăp, ntĭm nti nuĭh gŭ ndrung. Mbah rhơn ăp nău dơi ntoh lư ma mpôl cảnh sát, nuĭh mât njrăng ndrung krŭng hŏ dơi geh tâm bah ri aơ nơh; yơn lah Tổng Bí thư, Kruanh dak Tô Lâm an lah đŏng, he ân uănh sŏng tâm pah kan mât bôk kan, nhŭp kân, plơ̆ lăp nsum tay ƀon lan hôm mô năn ban đah nău ŭch geh ngăn ngăn đŏng. Tổng Bí thư, Kruanh dak Tô Lâm dăn đă, rgum tĭng ƀư 6 trong rƀŏng têh, tâm nê, ân rgâl mhe nău mĭn mpeh dŏng nău tih nhŭp kân nuĭh n’hanh pah kan mât uănh ntĭm nti, rgâl dăng bah nău mĭn mât njrăng nuĭh gŭ ndrung jêng yŭt bât jêng kon nuĭh. Păng đă, nkre ƀư lhăt đah pah kan dŏng nău tih nhŭp kân nuĭh đah njrăng n’gang, ban saơ, rlăch ndăng đah nuĭh tih n’hanh rdâk njêng nău rêh jêng đăp mpăn bah n’gu tơm đŏng.