Ta rơh rƀŭn nchră bôk nău kan mpeh ntrong rgâl mhe pah kan ueh nđir n’hanh ƀư tĭng nău mpŏng kan ESG (Ntŭk gŭ rêh- nău rêh jêng- mât uănh) yor UBND n’gor Gia Lai leo ƀư, rlău 120 đại biểu lah ăp nuĭh way kan, nuĭh mât uănh n’hanh doanh nghiệp lĕ ndrel tâm mbơh ăp trong kan kơl an doanh nghiệp tâm di đah nău ŭch mhe bâh ntŭk tăch rgâl. Âk nău tâm rgop an lah, rgâl mhe ueh nđir lah nău kan khlăy ngăn gay ma doanh nghiệp mât  ndơ kan, pơk hvi ntŭk tăch rgâl n’hanh n’hao nău dơi tâm rlong. Ăp nuĭh way kan lĕ ntrŭt mbơh đă doanh nghiệp an geh uănh rgâl mhe ueh nđir lah rnoh ntuh kơl an hun hao nâp nâl ndơn kanŭng geh ntoh hoach dŏng prăk kan. Ntoh ngơi ta rơh tâm nchră, Kruanh UBND n’gor Gia Lai Phạm Anh Tuấn lah na nê̆, lvang năm 2026-2030, ta ntŭk mbra ntrôl dăng rgâl mhe rnoh mbrô, rgâl mhe ueh nđir, hun hao công nghiệp nkret ƀư, ŭnh nar mhe njêng n’hanh tuch tăm công nghệ mhe. N’gor lĕ geh ton rgâl dăng bâh nău mĭn mât uănh tât nău kơl kan, hăn ndrel đah doanh nghiệp tâm ntrong kan mbơh tơih ăp nău nchrăp kan. “N’gor Gia Lai mbra geh nău kan hăn ndrel đah doanh nghiệp ta rơh rgâl mhe nđir. Ngih dak mbra kơl an ăp nău kan na nê̆ bâh du đê̆ nău kơl kan. Yơn khlăy ngăn lah nău mĭn bâh nuĭh leo bôk năp n’gâng kan, doanh nghiệp an geh saơ aơ lah nău khlăy rgâl mhe gay ma dơi rêh. N’gor an geh ntĭm đă tay, ƀư răng dăng ăp nău rgâl mhe rnoh mbrô ueh nđir ta n’gor đah nău kan ngăch lơn, răng dăng lơn n’hanh săk rnglăy lơn”.

Mô dơn ta trong kan công nghiệp, rgâl mhe rnoh mbrô ueh nđir lĕ dôl geh Đăk Lăk uănh năl lah trong kan dŭt khlăy ngăn gay ma hun hao n’gâng kan tuch tăm ueh mhe n’hanh nâp nâl. Mhe nơh, ta rơh tâm nchră “hun hao tuch tăm công nghệ mhe” lah rơh n’hanh nău kan tơm khlăy an doanh nghiệp”, ăp nuĭh way kan uănh năl, bol ma geh mât rlău 824 rbăn ha neh pah kan tuch tăm ndrel đah âk ntil ndơ tăch an dak bah dih tơm, yơn nău kŏ văk têh ngăn aƀaơ lah mô toư̆ng nuĭh kan gĭt blău, ndơ dŏng mô hŏ tâm ban, rnoh neh kloh ueh mô geh n’hanh ăp nău way kan hành chính hôm nha ntoch jong. Tiến sĩ Bùi Thị Ngọc Dung, viện mât uănh n’hanh njêng nău kan tuch tăm an lah.“An geh rnoh neh kloh ueh gay ma mbơh an nuĭh ntuh kơl. Tal 2 lah nău mĭn nău nsrôih bâh nuĭh leo kan n’gor ndrel đah ăp ntŭk kan n’gâng kan, ăp ntŭk, nsrôih koh n’huch ăp nău kan hành chính jêr jŏt mô tâm di tĭng nău way poăn n’huch gay ma mhâm ƀư an doanh nghiệp geh gĭt ngăch n’hanh bu ngăch geh ƀư nău kan ngăn. Ntrong kan tal pe lah ntrong nuĭh kan n’hanh rnoh ƀư lĕ rngôch ăp rnoh mbrô n’gâng kan tuch tăm. Rnôk ma doanh nghiệp lăp khân păng geh saơ rnoh mbrô kloh rjăp n’hanh dŭt na nê̆ ngăn”.

Tĭng nău mbơh bâh Tiến sĩ Phan Việt Hà, groi viện trưởng mât uănh Viện khoa học kĩ  thuật Nông lâm nghiệp Tây Nguyên, hun hao tuch tăm công nghệ mhe kanŭng n’hao săk rnglăy rnôk geh nău tâm rgop na nê̆ đah Ngih dak, nuĭh kan khoa học, doanh nghiệp n’hanh ƀon lan kan lŏ mir, bâh nĕ geh săch n’hanh ndơ̆ mbơh nău kan công nghệ an tâm di đah ăp ntŭk, njêng rnoh pah kan nâp nâl lơn.“ Nău khlăy ngăn lah mbra dơi tâm rgop doanh nghiệp đah nuĭh kan khoa học n’hanh nuĭh kan mât leo kan. Gay ma dơi geh săch ăp công nghệ pah kan an tâm di ngăn, bâh nĕ geh dŏng công nghệ tâm di lơn đah nău dơi geh ta ntŭk gay ma dơi n’hao công nghệ nĕ tâm rnôk nău kan aƀaơ”.