Tâm 2 rơh tâm lơh mprơh Mỹ n’hanh lơh Prăng, chùa Ôchumaram Prếk Chếk, xã Vĩnh Quới, thị xã Ngã Năm lah ntŭk mpôn mât âk nuĭh kan cách mạng. Chùa hŏ geh âk tơ̆ phŭng rlăng an ndeh păr ntŭp bom, pănh lơh. Aƀaơ, chùa Ô chumaram Prếk Chếk jêng ndơ an saơ lịch sử han dăng bah tahen n’hanh ƀon lan Sóc Trăng. Tâm bah ri aơ nơh, n’gor Sóc Trăng hŏ geh âk trong ntuh kơl, nkra têh uĕh tay, rgop mât ndray, ntik n’hao đah rnoh khlay lịch sử dja. Chùa hŏ dơi dăp tâm săk ntŭk têl ơm yău văn hoá gưl n’gor tâm năm 2008. Đại đức Sơn Phước Lợi, trụ trì chùa Ô Chumaram Pkếk Chếk an gĭt:

N’gâng kan ta ntŭk, gưl thị xã n’hanh gưl n’gor mât uănh khlay rdâk njêng tay chánh điện. n’gor ntop kơl rlău 1 rmen prăk, tâm nê ri sư rgŏ jă kônh wa tâm bổn sóc n’hanh phật tử dăch ngai kơi rgop tay đŏng.

Sĭt tât xã Vĩnh Quới tâm  ăp nar dja, dŭt nkah uĕh mpeh nău lhut săk rgâl ntô bah du nkual ƀon  lan ơm ach o jêr jŏt, aƀaơ hŏ tât di rnoh rdâk njêng ƀon lan mhe. Păch pêng ntung trong ndơ dŏng tâm thôn ƀon dơi ntuh kơl ăp kôp, njăr trong mbluh nthoi bah xã tât ăp ấp n’hanh ăp nkuâl êng ƀa ƀă. Ăp trong me hôm dơi ntrŭp ŭnh mpoh ang tăm tơm kao kiểng; nhih nti, nhih dak si, jay văn hóa dơi nkra têh uĕh da dê. Bah nê, n’hao nău rêh, drăp ndơ, nuih n’hâm bah nuĭh ƀon lan mô rlu dơi n’hao prêh, rĭng geh tĭng bôk nuĭh geh tât 73 rkeh prăk/nuĭh/năm, rnoh  âk rnăk ach o âk ding hôm 2,39%.

Wa Lâm Ở, nuĭh ƀon lan ta xã Vĩnh Quới nkoch, đah n’hong dak bât, trạm bơm kơl ƀư nău kan tuch tăm nsĭt geh wăng sa âk.

Aƀaơ nău tăm ba dơh ntơ lơn, yor Vĩnh Quới dja geh ƀơ bŭng jĭr êng, geh trạm bơm, ba geh rnoh khlay, tăch dơh đŏng, ntil dŭt uĕh jêng đŏng. Aƀaơ nău  kan tuch tăm lơn âk ma ndeh rklư jêng nuĭh ƀon lan dŭt dơh ngăch, mô kâp kan jâk r’ah kơt kăl e nơh đŏng.

Tâm ăp năm rlău aơ, n’gor Sóc Trăng way uănh khlay rđău đă ăp n’gâng kan, ăp gưl an ƀư năn ngăch ăp trong kơl rnoi mpôl đê̆, rgum tĭng ƀư lĕ n’hâm suan ăp bôk nău kan, trong nchrăp ntrŭt ntrôl hun hao wăng  sa- rêh jêng kon nuĭh nkual ƀon lan rnoi Khmer. Nơm geh kơt nê, nô nău wăng sa- rêh jêng kon nuĭh nkual rnoi mpôl đê̆ geh hun hao, nău rêh, drăp ndơ, nuih n’hâm dơi mât uănh khlay, ăp trong kan dak si, ntĭm nti, văn hoá, rêh jêng kon nuĭh geh âk nău rgâl uĕh.

Châu Thành lah nkuâl geh bơi n’gul rnoh nuĭh rnoi Khmer. Aƀaơ nău rêh bah kônh wa mô rlu dơi n’hao prêh. Lah nkuâl geh âk mpeh tuch tăm, gay n’hao nău geh wăng sa an nuĭh ƀon lan, Châu Thành rgum ntrôl dăng tuch tăm tĭng trong rƀŏng n’hao rnoh khlay n’hanh hun hao nâp dăng. Âk trong ntĭt leo nsĭt geh dơi rdâk njêng, kơt tăm rpŭng jal ma dak ntrăm, tăm play táo, tăm biăp tâm jay jal,… ăp trong ntĭt leo mât rong sŭr công nghệ jĭr êng..., Nơm geh kơt nê, rnoh khlay tuch tăm rĭng nsĭt geh 152 rkeh prăk 1 ha năm 2023; rĭng geh tĭng bôk nuĭh ta nkual thôn ƀon geh bơi 61 rkeh prăk.

Wa Nguyễn Văn Mỹ, Groi kruanh UBND nkuâl Châu Thành, an gĭt, lôch âk năm nsrôih, kêng dŭt năm e nơh, nkuâl hŏ dơi kơp dơn di rnoh ƀon lan mhe. Lơn lah, rnoh âk rnăk ach o n’hanh dăch kêng ach o hŭch hôm 3%.

 Nkuâl hŏ rgum ăp tơm ndơ, lor bôk năp lah ntơm bah ăp bôk nău kan trong nchrăp tâm nê, geh ăp bôk nău kan mpeh ƀon lan mhe, bôk nău kan  mpeh rnoi mpôl đê̆, ma 2 bôk nău kan dja hŏ ntop kơl kơt rdâk njêng ntŭk ntô ndơ dŏng thôn ƀon, ntop kơl an kônh wa ƀư ntil, ndơ dŏng kan tuch tăm, tĭng ƀư ăp trong ntĭt leo tuch tăm, hôm ntop kơl an kônh wa mpeh ăp trong kơl n’hŭch ach o, kơl an kônh wa mpeh bảo hiểm y tế, ntĭm nti, trong kơl hŏ ntik n’hao geh nău tam hŏ rgop dŭt âk an kônh wa nsrôih nsan hao klaih rlău ach o, măt êng ri nuih n’hâm bah kônh wa đah nău mĭn nsrôih ndôr êng jêng lor nchrăp nsrôih klaih rlău ach o lah ngoăy tâm ăp ntŭk chrat ang bah nkuâl đŏng.

Đah nău nsrôih âk bah n’gâng kan ta ntŭk n’hanh nuih n’hâm nsan hao bah nuĭh ƀon lan, muh măt n’gor Sóc Trăng, lơn lah nkual rnoi mpôl đê̆ Khmer dôl tĭng kơn rgâl săk, lăp nsum tâm nău rêh mhe bah ƀon tơm, neh dak nar aơ.

VOV DBSCL