Gay uănh lah ngăn ngên săk rrnglăy mbơh ƀư n’hanh rgop na nê̆ ăp trong mkra têh bah Trung ương lăp nău rêh ƀon lan, mhe rlău, Ban Dân tộc HĐND n’gor Dak Lak lĕ ƀư rơh hăn uănh ngăn ta ăp ntrong ƀư pâl nđaih nsum mpôl ta ntŭk. Mpôl hăn uănh lĕ na nê̆ pah kan ta ƀon Kli A (phường Buôn Hồ), ƀon Tuôr (xă Hòa Phú), ƀon Tơng Jŭ (xă Ea Kao) n’hanh ƀon Akŏ Dhông (phường Buôn Ma Thuột). Jêh hăn uănh an saơ, nău kơl bah n’gor lĕ geh nău ntrŭt khlay kơl nuĭh ƀon lan nchrăp tâm pă tơm prăk, pơk hvi ntuh kơl n’hanh jêng âk ndơ ƀư ngăn đah Văn hóa way ơm, nău kan jâng ti, jêng joi nău rêh nâp nâl an kônh wa. Aơ lah nkô̆ nău an saơ na nê̆ an nău rgâl drăp ndơ văn hóa jêng n’hâm soan hun hao di trong nchrŏng khlay bah Nghị quyết 80.

Yơn lah, gay rgop săk rnglăy na nê̆ tay ăp ntĭm rđău bah Bộ Chính trị mpeh mât ndrăy văn hóa tâm lvang mhe, ăp ntŭk dăn đă n’gor bah Bộ Chính trị mpeh mât ndrăy văn hóa tâm lvang mhe, ăp ntŭk dăn đă n’gor an n’hao prêh nău kơl. Uănh khlay ntop kơl mât ndrăy ntŭk ntô văn hóa, ntĭm nti n’hanh ntrôl dăng boăt nthoi nkual. Wa Y Kle Knul, Groi Kruanh Jrô kan Văn hóa xã hội Hòa Phú nkoch nău dăn đă: “Ân uănh tât tay ntop kơl prăk mât ndrăy jay nhih way ơm, nău kan cheh tach, ntŭk ntô văn hóa chĭng gông, ăp lễ hội way ơm n’hanh ndâk ƀư ndơ mât ndrăy geh nău uĕh văn hóa ta ntŭk. N’hao trong kan ntrŭt ngăch, mpla nsơ, ndâk ƀư tour boăt nthoi Buôn Tuôr đah ăp ntŭk pâl nđaih ta lam n’gor gay pơk hvi năch n’hanh n’hao săk rnglăp ƀư ăp ndơ pâl nđaih nsum mpôl”.

Tĭng Ban Dân tộc HĐND n’gor Dak Lak, nău mbơh ƀư Nghị quyết 80 đă nuĭh ƀon lan an ngăn ngên ƀư tơm râng n’hanh geh bah ăp nău khlay văn hóa bah nơm. Ăp djôt dơn bah ngăn mbra nkô̆ khlay gay n’gor jêh trong ƀư, n’hao ăp nău kơl hun hao. Lah rjăp mpeh trong hăn tay gay ndơ̆ Nghị quyết bah Đảng lăp nău rêh, wa Đỗ Thị Như Tình, Kruanh Ban Dân tộc HĐND n’gor Dak Lak an gĭt:  “Mpôl hăn uănh djôt dơn ăp nău lah ngăn tâm rnôk mbơh ƀư tĭng Nghị quyết n’hanh ăp nău kơl ta ntŭk. Tĭng nkô̆ nău nĕ ri mbra mĭn njêng dăn đă mbơh ƀư du nghị quyết mhe mpeh hun hao pâl nđaih nsum mpôl đah mât ndrăy n’hanh mât nău uĕh văn hóa tâm lvang mhe ri mbra nsĭt tay săk rnglăy lơn”.

Nău ndăn mĭn njêng, ndâk ƀư Nghị quyết mhe bah HĐND n’gor rgop êp nău ngăn lah trong hăn na nê̆, dŭt n’hâm gay ndơ̆ Nghị quyết 80 bah Bộ Chính trị hăn lăp jru; rgâl ntŭk văn hóa Tây Nguyên jêng n’hâm soan hun hao wăng sa-rêh jêng rgâl hao an Dak Lak tâm năm tât.