Nău nchrăp ƀư gưl trong têh hăn ngăch Hoài Nam-Quy Nhơn mpeh tâm trong têh hăn ngăch Bắc-Nam mpeh bah Lơ lĕ jêh tŏng ăp trong kan ndâk ƀư. Ban Mât uănh nău nchrăp ƀư 85 an gĭt dôl jêh ăp samƀŭt n’glêh dŭt gay ndơ̆ lvang trong aơ lăp an dŏng dâl tâm rơh Tết Nguyên đán. Nô Nguyễn Trọng Quân-phung pah kan Công ty Cổ phần 479 Hòa Bình răm rhơn rnôk ndrel rmôt kỹ sư-phung pah kan công ty lĕ jêh nău kan, rgop ndơ̆ nău nchrăp ƀư tât lor ơm.

Lah nsum nău kan bah mpôl oh dŭt ŏk r’ah dơi uănh tât bah mpôl cán bộ nĕ ri lah nsum mpôl oh dŭt nsrôih ƀư na nao ntop nar luh n’hanh luh măng gay an pơng ngăch jêh nău kan dôl ngăch jêng oh nô gŭ kâp n’hanh nsrôih gay jêh uĕh nău kan bah lơ jao.

Geh măt ta ntŭk kan trong têh hăn ngăch Chợ Mới-Bắc Kạn, Đại tá Võ Khắc Hùng, Groi Tư lệnh Binh đoàn 12, Tổng công ty Xây dựng Trường Sơn an gĭt: Nău nchrăp hăn rlău ntŭk ntô jêr, yôk sop, jêr jŏt, đah jong 28,8 km, dĭng lĕ rnoh ntuh kơl rlău 5.750 rmen prăk. Ăp nuĭh tahen wa Hồ dôl nsrôih ntrôl ngăch ndâk ƀư.

Tahen Trường Sơn mpôl hên dŭt lap ntô̆ n’hao, dơi Đảng ngih dak jao dŭt âk nău nchrăp ƀư khlay, kơt ăp nău nchrăp ƀư trong têh hăn ngăch. Mpôl hên mĭn aơ lah nău nchrăp ƀư khlay ntrŭnh an ƀư “3 ca 4 kíp di kơt nuih n’hâm nuĭh tahen gay lôch jêh.

Săk ăp doanh nghiệp Việt rgop tâm nău rƀŏng lôch jêh rlău 3.000 km trong têh hăn ngăch lvang aơ lĕ dơi Kruanh N’gâng kan Xây dựng Trần Hồng Minh âk tơ̆ nkah ntĭnh, đah nău nsing nơm n’hanh ntô̆ n’hao, kơt: Phương Thành, Đèo Cả, Sơn Hải, Lizen, Vinaconex, Trường Sơn... ăp doanh nghiệp lĕ ƀư tĭng tâm ton, kơt dŏng khoa học công nghệ, ntop nar luh, ntop mông, geh rnôk an “ŭch n’hŭch prăk kon, trok rnon” yor ngăch ăp nău nchrăp ƀư. Êng  nuĭh, wa Phạm Văn Khôi, Kruanh HĐQT Công ty Phương Thành nkoch, doanh nghiệp bah wa râng 4 nău nchrăp ƀư trong têh hăn ngăch. Tâm nĕ, geh 2 nău nchrăp ƀư lvang 2 geh Vũng Áng-Bùng n’hanh Vân Phong-Nha Trang.

Plơ̆ tay miền Nam, tât đah nkual dak mhe dâng rđŭng Cửu Long, wa Trần Văn Thi, Giám đốc Ban mât uănh nău nchrăp ƀư Mỹ Thuận-nuĭh hăn ndrel đah nău kan ntung trong bơi 30 năm-djăt wa nkoch mpeh ăp nar khay hang rbăn phung pah kan, kỹ sư nău kan ntung trong nsrôih jêh ăp ndơ ƀư khlay ngih dak, đah n’hâm soan, bôk rngok bah ăp nuĭh djôt nău kan “hăn lor pơk trong” ta ăp trong têh hăn ngăch n’gâng rgăn, bah Cần Thơ tât Cà Mau:

Đah rmôt kỹ sư, phung pah kan nuĭh Việt Nam, mpôl hên n’gluh soan tâm rlong gay jêh ăp ndơ ƀư ơm ndơ̆ an dŏng gay rhŏ an nuĭh ƀon lan rhŏ an neh dak n’hanh gay ntrôl hao jêng wăng sa. Ndrel đah nău ndâk ƀư ntung trong an neh dak ri nău wau kan dơi kan công nghệ bah rmôt bâh mât uănh tât mbơh ntĭm tât ndâk ƀư dơi hun hao. Mpôl hên lap uănh saơ lvang hun hao bah nău kan n’hanh đah nău hun hao neh dak, mpôl hên saơ dŭt ntô̆ n’hao.

Hăng rhiăng rbăn kon nuĭh, đah nuih n’hâm tâm rlong “rlău duh dăng mih, pah kan n’ăp lễ, tết, ƀư nar ƀư măng” gay ndơ̆ ăp nău nchrăp ƀư trong têh hăn ngăch di nar mô lah rlău di nar. Dăn nkoch nău PGS.TS Trần Chủng, Kruanh Hiệp hội ăp Nuĭh ndranh ndơ ƀư ntung trong ndeh Việt Nam rnôk lah mpeh n’hâm soan, nău rgop bah ăp nuĭh ƀư jêng ăp ndơ jong năm.

 He an nkoch nău lah uĕh đah ăp nuĭh ƀư nău kan ntung trong ma Wa Hồ kăl e lah “phu đường”. “Phu đường khổ lắm ai ơi”. Ŏk r’ah ngăn. Jêng he lah uĕh khân pơng. Lah uĕh ăp nuĭh “ƀư trong mhe aƀaơ” nar aơ lĕ ƀư an he ăp ndơ ƀư trong têh hăn ngăch na nao đăp mpăn ntrôl nău hun hao wăng sa, đăp mpăn an nuĭh ƀon lan n’hanh dăch uĕh đah ntŭk ntô gŭ âm.

Rlău 3.500km trong têh hăn ngăch lĕ uĕh jêng, pơk luh nuih n’hâm mhe an hun hao neh dak n’hanh ntop tay nău nsing nơm tâm nău rƀŏng 5.000km trong têh hăn ngăch tâm năm 2030. Mpeh bah kơi ăp trong têh lah dak rhal, bôk rngok n’hanh nuih n’hâm nâp bah hang rhiăng rbăn kỹ sư, phung pah kan, nuĭh tahen Trương Sơn n’hanh ăp doanh nghiệp Việt Nam pah kan n’ăp lễ, tết, nar măng ta ntŭk kan. Ăp trong hăn nar aơ lah n’gâng tơm an nău rêh rgŏ năp-gay Việt Nam hao ngăch nâp nâl, hăn ngăch lơn, hăn ngai lơn ta trong rƀŏng tâm rach năm hao êng nơm bah rnoi nuĭh./.