VOV4.M’nông:   Bah du nău kuăl jă rgop rwăt ndrôk ntil yor Bí thư Đảng ủy xă Cư Pui, nkuăl Krông Bôk n’gor Dak Lak nchih tâm mạng xã hội, tât aƀaơ ta xă nkual jru ngai aơ lĕ geh du “ntŭk ndrôk ntil” kơl ăp rnăk ach o dơi geh hao. Nău kan bah nuĭh djôt bôk n’hanh nuih n’hâm  tâm rnglăp bah nsum mpôl Đảng ủy xă, lĕ jêng nuih n’hâm dŭt na nê̆ n’hanh geh nkô̆ nău ngăn ngên.

          Mpôl hên mâp nô Vàng Seo Vư, ta thôn Ea Rớt, xă Cư Pui, nkuăl Krông Bông, n’gor Dak Lak rnôk mâp nô dôl mô ru pah kan kơl mpôl ƀư jay. Đah lir lar gạch choih, kho ao krêp hồ xây yơn nô Vư dŭt răm, yor nar geh jay mhe dôl dŭt êp. Nô Vư nkoch: Năm 1996, rnăk wâl nô bah Hà Giang hăn trơn gŭ tâm nkual jru Ea Rớt. Mô tâm di neh ntu, ur way kop ji mro, rnăk wâl lŏ âk kon jêng jêr jŏt âk mpưm. Jay si sat jŭr djơh âk năm yơn mô geh prăk nkra. Năm 2017, nô dơi du mlâm ndrôk me khlay rlău 15 rkeh prăk bâh bôk nău kan “Ntŭk mât ndrôk ntil” bah xă. Jêh du năm mât rong, ndrôk me lĕ deh kon n’hanh nô lĕ mplơ̆ ndrôk ntil an bôk nău kan gay rgâl an rnăk êng mât tay. Tât aƀaơ, jêh 4 năm mât rong, ndrôk kon lĕ deh tay 3 mlâm. Nău rêh bah rnăk wâl nar lơ đăp mpăn, Rnôk xă kuăl jă geh 60 rkeh prăk gay kơl nô ƀư jay, ri rnăk wâl ntop tay 20 rkeh prăk, gay ƀư jay têh uĕh lơn. Nô Vàng Seo Vư lah:

“Lah uĕh xă lĕ an rnăk wâl kon ndrôk gay mât. Bah nĕ, pơng deh geh 3 mlâm kon, aƀaơ rnăk wâl tăch 2 mlâm gay nchrăp ƀư jay. Rnăk wâl lah uĕh xă dŭt uănh tât”.

Ndrôk ntil deh kon mhe rgâl tay an rnăk nô Sinh

Tâm ban ma nĕ, nô Vũ Văn Sinh tâm rnăk ach o, ta thôn Ea Rớt, mhe dơi dơn ndrôk ntil. Nô Sinh an gĭt, gâp mbra nsrôih mât an uĕh gay ndrôk deh kon, ngăch rgâl wăng sa rnăk wâl:

“Dơi dơn ndrôk ntop kơl, rnăk wâl gâp dŭt răm. Gâp mbra nsrôih mât gay an pơng deh kon, gay hun hao wăng sa rnăk wâl, đăp mpăn nău rêh. Lah uĕh xă n’hanh ƀon lan uănh mĭn tât rnăk wâl”.

Tĭng wa Vàng Seo Măng, Kruanh thôn Ea Rớt: Ăp năm bah năp, knơm n’gâng kan ƀon lan ntop kơl, ăp rnăk ach o dơi dơn ndrôk mât rong dŭt n’hâm, mât n’hanh pơk hvi tay ntrong kan ntŭk mât rŏng ndrôk đah nău ŭch ngăch rklaih ach o.

“Bơi 80% nuĭh ƀon lan lĕ dơi rgâl tay, du rnăk dơi geh du rơh hôm. Knơm nĕ nău rêh kônh wa ta aơ lĕ dơi rgâl săk. Rnăk ach o hôm e dŭt âk yơn âk nuĭh, âk rnăk mô hôm ji ngot tay”.

Du rnăk ta Ea Rớt nchrăp pih an ndrôk sa.

Thôn Ea Rớt, xă Cư Pui, nkuăl Krông Bông dơi gĭt tât lah thôn jêr jŏt ngăn bah n’gor Dak Lak. Ntŭk mât ndrôk ntil lah ngoăy tâm âk nău ƀư mhe gay kơl nuĭh ƀon lan hao. Kruanh UBND xă, wa Nguyễn Văn Tâm lah nuĭh hăn lor, wa nchih kuăl jă tâm mạng xã hội gay joi prăk kơl. Jêh âk ndrôk bôk năp dơi an rnăk ach o ta ntŭk, nău ƀư aơ dơi ăp đồng chí tâm Đảng ủy, ủy ban nhân dân xă rƀŏng tĭng lam hvi. Jêh 5 năm, tât aƀaơ lĕ geh 43 mlâm ndrôk ntil deh kon dơi an ăp rnăk ach o, kơl kônh wa ntơm rklaih luh jêr jŏt. Aƀaơ, wa Nguyễn Văn Tâm lĕ rgâl ƀư Bí thư Đảng ủy, hôm e xă Cư Pui lĕ geh du ntŭk ndrôk ntil. Wa Tâm an gĭt: Ndrel đah tĭng rjăp tâm nău kan kruanh, ntĭm rđău ƀĭt joet hun hao wăng sa, jŭt jăng ach o, nău ăp đồng chí tâm Đảng ủy xă râng rgŏ jă kơl nuĭh ach o, lĕ ntop ăp săk rnglăy na nê̆:

“Tât aƀaơ mpôl ndrôk lĕ hun hao 67 mlâm. Geh rnăk tât aƀaơ hun hao geh 3 mlâm. Geh nuĭh bah nău ntop kơl nĕ mât rong têh tăch rgop prăk ƀư jay gŭ. Kônh wa dŭt rhơn, ntŭk mât rong ndrôk ntil Ea Rớt tât aƀaơ săk rnglăy nsĭt tay dŭt lah têh”.

Mô knŭng dŭt n’hâm lăp mạng xã hội rgŏ jă ăp nuĭh lŏng bôk tôr, nuĭh geh rgop kơl, bah Bí thư đảng ủy tât ăp cán bộ xă ta Cư Pui hôm rgŏ jă nuĭh băl mpôl, oh nô ndrel ty tâm rgop soan, rgop ndơ rwăt tay ndrôk ntil ntop kơl nuĭh ach o. Ăp nău ƀư geh nkô̆ cán bộ, đảng viên ta xă lĕ kơl an âk rnăk ach o ntŭk aơ tĭng nar đăp mpăn nău rêh.

Nuĭh rlang: Y Sưng Phê Ja