VOV4.M’nông: Nau kan “tâm rgop rnăk công nhân rnoi Yoăn ndrel rnoi mpôl đê̆ tâm nkuăl” yor Binh đoàn 15 ntrŭnh hŏ leo nsĭt nau săk geh tam ngăn. Bah nau kan tâm rnglăp, ăp rnăk rnoi Yoăn kơl an rnoi mpôl đê̆ tâm Gia Lai rgâl nau mĭn tâm nau hun hao văng sa, jut n’huch ach o, rgop nau n’hao nau tâm rnglăp lam ƀon lan.

            Yuh Nguyễn Thị Kim Thanh, Đội 4, Công ty Bình Dương, Binh đoàn 15 lah ăp rnăk lor trong tâm nau kơt tĭng nau “tâm rgop rnăk công nhân rnoi Yoăn ndrel rnoi mpôl đê̆ tâm ntŭk”. Yuh Thanh ndơn kơl an rnăk yuh Kpuih Bler, rnoi Jrai pah kan nsum công ty, tâm xã Ia Tô, nkuăl Chư Prông, n’gor Gia Lai. Bah năp nơh, rnăk Kpuih Bler lah rnăk ach o, geh mir yơn lơi dơm, knŭng tăm ba, mbo. Bol ma ur sai yuh nsôih kan yơn lah mô tŏng sa, mô tŏng nsoh. Ntơm bah rnôk geh nau kơl an bah rnăk yuh Thanh, nau rêh rnăk Kpuih Bler hŏ mbơm oi. Tât rnôk aơ, rnăk Kpuih Bler geh rlau 3 ha điều, cà phê, nau geh văng sa đăp mpăn. Rnăk vâl mô êng tŏng sa ma hôm geh ndơ têm. Yuh Kpuih Bler, Đội 4, Công ty Bình Dương, Binh đoàn 15 nkoch:

            ‘Lah rnôk geh nau ji kuet, rơ̆ ma nê, lah geh oh nur êng êng geh nau ji kuet ri gâp kŏ tât kơl an đŏng. Lah nsum ri oh nur rêh ueh ngăn, tâm kơl an âk ntil nau ngăn”.

            Hôm đah yuh Nguyễn Thị Kim Thanh-Đội 4, công ty Bình Dương, Binh đoàn 15, nau kơl an yuh Kpuih Bler lah nau rhơn bah nơm. Yuh Thanh nkoch, rnôk mhe tât xã Ia Tô ndâk nau kan, nau rêh bah rnăk yuh mâp âk nau jêr, rnơm geh nau nkŭm kơl bah ƀon lan, rnăk vâl ri yuh Thanh mơ geh nau rêh ueh kơt rnôk aơ. Ndri ma, nau kan kơl an bah ƀon lan lah nsum ndrel Kpuih Bler kŏ lah nau kan kơl ueh:

            ‘Ntĭm nti tâm kơl tâm nau kan, jêh ri koh n’ging, tŏ dak mhâm ƀư ân ueh ân tŏng, ntĭm nau mât rong, tăm byăp kloh, văng sa bah rnăk vâl. Tâm bonh tâm đă, mô êng mpeh nau văng sa ma nau rêh ăp nar, rnôk ji kuet, nau khuch khat ri gâp kŏ lah ntŭk ân rnăk đồng chí Bler”.

Nau kan “tâm rgop kơl đah ăp rnăk công nhân rnoi Yoăn ndrel rnăk nŭih rnoi mpôl đê̆” geh Binh đoàn 15 rgŏ jă ntơm năm 2006. Ntơm bah 30 rnăk bôk năp, tât rnôk aơ, rmôt kan hŏ ƀư rêng hao tât 4000 rnăk, tâm nê geh nklăp 2000 rnăk rnoi mpôl đê̆. Nau kan tâm rgop kơl njêng nau tâm dăch, tâm gĭt rbăng ndrel tâm kơl tâm rnôk mâp nau jêr, ndrel tâm kơl tâm nau hun hao văng sa rnăk vâl.

            Ăp nŭih tâm rgop kơl an hŏ ân mpơl saơ ân nau bonh đă săk tam, ngăn bah Binh đoàn 15. Bah nê nau tâm rnglăp tâm kơl đah ăp nŭih pah kan tâm rmôt kan; đah công nhân ndrel ƀon lan tâm ƀon nar lơn tâm dăch tâm dơh. Thượng tá Khuất Bá Cao-Bí thư Đảng uỷ Binh đoàn 15, mbơh:

‘Bah nau ƀư nau kan tâm rgop tâm kơl, tâm ăp năm êp ăp rgop âk ngăn tâm nau đăp mpăn ndrel hun hao văng sa bah rmôt. Nkre lah, rgop nau ndrel gưl uỷ, n’gâng kan bah nkuăl, ăp rmôt ƀư nau kan tâm nkuăl kŏ mât nau đăp mpăn chính trị, đăp mpăn nau rêh jêng kon nŭih ndrel đăp mpăn ƀon lan. Ăp rnăk ƀon lan rnoi mpôl đê̆ mô êng rklaih ach o ma hao jêng sâm geh, geh âk rnăk tât rnôk aơ geh ntơm 200 tât 300 rkeh prăk tâm du năm”.

            Nau săk tam bah nau kan “tâm rgop ăp rnăk” tâm kơl hun hao văng sa rêh jêng bah Binh đoàn 15 hŏ njêng luh ăp nau ang mpeh văng sa, văn hoá, rêh jêng, neh dak, rnăk njrăng. Bah nê njêng geh nau rnơm, nau tâm rgop đah gưl uỷ, n’gâng kan ndrel ƀon lan tâm nkuăl./.

Nŭih rblang: H’Thi