Nău sŏk ntil ADN dôl geh dŏng đah lĕ ma rnăk vâl nuĭh tahen khĭt tâm lơh kăl e ê hŏ geh saơ môch tâp mô lah mô geh nting n’hanh geh ƀư tĭng nău way an lor sŏk ntil tĭng ndul me. Đah tahen  lah bu klô , bôk năp lah sŏk ntil mham me deh, u mpeh me, oh nô ndrel ndeh, lôch nĕ tât kônh wa, yơ n’hanh ăp nuĭh bên êng tĭng mpôl mpeh mê̆. Đah tahen bu ur lah mê̆ deh, kon deh, său lôch nĕ tât yuh nô ndrel mê̆ n’hanh ăp nuĭh tâm rnăk vâl êng tĭng nău ntrŭnh.

Wa  Nguyễn Thị Thanh Lịch, Groi Kruanh UBND n’gor, Kruanh rnâng kan ntĭm leo joi, rgum n’hanh uănh năl nting tahen khĭt tâm lơh kăl e ta n’gor Gia Lai, nău geh sŏk năl ntil ADN lah nău kan chính trị khlăy ngăn, mpơl nău mĭn ngêt dak kahgĭt tu, gay ma lah ueh ăp tahen khĭt tâm lơh kăl e lĕ geh mât đăp mpăn an neh dak. “ơm geh năl săk ntơ tahen khĭt, ndơ̆ ăp tahen khĭt sĭt ơm đah rnăk vâl nơm lah ngoăy tâm âk nău kan ntrŭt ntrôl hên an geh rlet rlău âk nău jêr gay ma ƀư tĭng. Ngăn lah kahgĭt 80 năm nar tahen khĭt tâm lơh lah rơh gay ma ăp rơh mom lah ueh đah nău tâm rgop bâh lĕ tahen khĭt tâm lơh kăl e an nău kan mât đăp mpăn bâh neh dak. ƀư tĭng ngăn ngên an geh nău dơi năl ADN tahen khĭt, joi rgum geh nuĭh bên tâm rnăk vâl tahen khĭt tâm lơh kăl e”.

Tâm 2 nar lơ 1 n’hanh 2/7, bâh nău mbơh yor ƀon lan pă mbơh, Đội K51, n’gâng kan leo kan Quân sự n’gor  Đăk Lăk leo kan, tâm rgop đah rnâng kan leo kan Quân sự n’hanh UBND xã Krông Bông leo ƀư joi, sŏk rgum ta nkual mir cà phê bâh rnăk vâl wa Ama Ô Mi, ta thôn 6, xã Krông Bông, ta janag yôk Chư Yang Sin. Nău geh, mpôl kan lĕ geh rgum geh 2 nting tahen khĭt tâm lơh. Bâh ntrong kan sŏk kuaih, Đội K51 geh saơ  âk ntil ndơ dŏng ndrel đah nuĭh tahen khĭt tâm lơh kăl e kơt tăng, bạt, aó kaki, du đê̆ nău geh bâh máy thông tin tâm ôp nău ndrel đah ndơ dŏng tahen, ndơ dŏng ăp nar êng tahen nơm lĕ lêk ôm tĭng năm khay. Gay ma kơl an nău kan uănh năl ndơ săk, mpôl kan lĕ geh sŏk sêk, nting gay ma kơl an nău kan uănh năl ADN.

Ta phường Nha Trang, Bộ Chỉ huy Quân sự tn’gor Khánh Hoà ƀư rơh mbơh nău ntrŭnh bâh n’gâng kan mât rnă njrăng ngih dak mpeh nău njêng mpôl kan joi, rgum nting tahen khĭt tâm lơh kăl e. Mpôl kan aơ geh nău kan uănh năl nău ngăn, rgum nău mbơh, uănh năl môch tahen khĭt tâm lơh kăl e, joi, rgum kuai nting tahen khĭt, ntop ƀư dơi săk rnglăy nău kơl kan tâm pêt tâm kơl. Ntoh ngơi pă nău kan, Thiếu tướng Lương Đình chung, Chính ủy Quân khu 5 lah na nê̆, nău kan joi, rgum nting tahen khĭt mô dơn lah nău kan way kan ma hôm nha mpơl nău mĭn Ngêt dak kahgĭt tu, lah ueh ăp nuĭh lĕ khĭt yor nău đăp mpăn, ueh lăng bâh neh dak. Chính uỷ Quân khu 5 đă cán bộ, tahen tât râng mpôl kan way kan an geh uănh năl na nê̆ nău kan n’hanh nău dơn kan, uănh aơ lah nău ntrŭnh đă bâh play nuih, bâh nău way ơm mpôl rnoi.