Tâm Gia Lai, UBND n’gor mhe ntrŭnh đă ăp nau kan ndal tâm năm 2026, tâm nê uănh kloh nau ntuh kơl nkra trong n’hoch dak lah ngoai tâm ăp nau kan tơm khlay bah nau kan tuch tăm, ƀon lan. Pe ntŭk trong hoch dak têh đah rnoh ntuh kơl nklăp 810 rmen mra geh ntrŭnh ƀư tâm năm 2026-2030 gay rklaih nau geh dak tŏ ndrel dak dŏng tâm nkuăl mpeh ba lơ bah n’gor, ntŭk hôm âk nau tât mpeh hun hao tuch tăm yơn lah trong n’hoch pă dak ê tŏng nau ŭch ngăn.

            Tĭng nau nchrăp, ntŭk trong hoch dak Djang tâm xã Kbang đă mpăn tŏ ân 800 ha neh tăm ndrel pă dak dŏng ân nklăp 3.500 nŭih. Nglau dak Ka Tung tâm xã Tơ Tung kơl tŏ ân 1000 ha neh tăm ndrel pă dak dŏng ân rlau 2.600 rnăk ƀon lan. Nglau dak Đăk trau Dle, tâm xã Kon Chiêng đăp mpăn tŏ ân 600 ha neh tuch tăm, nkre rgop nau pa ưn’hoch bah dak lip.  Wa Cao Thanh Trương, Giám đốc N’gâng kan tuch tăm ndrel ntŭk ntu n’gor Gia Lai, mbơh:

            ‘Rnoh dak tŏ nchrăp ân neh tuch tăm tâm nkuăl mpeh ba dâng bah n’gor Gia Lai geh rlau 12%, ri ma gay ƀư ân ueh dăng dơi nau geh dơi bah nơm, njêng nkuăl tăm tơm âk, têh ân n’gor ndrel nkuăl ri ân geh rgum ntuh kơl nkra nâp trong ntŭk nti hoch dak. Tâm nau ntrŭnh Đại hội Đảng bộ n’gor Gia Lai năm kan 2025-2030 rgum tâm nau kơp uănh nau ntuh kơl nkra nâp ntrong n’hoch dak gay ƀư ueh nau dăng dơi mpeh neh ntu gay kơl an ân nau kan hun hao tuch tăm, ngăn lah tâm nau kan tuch tăm gay ma kơl an ê nkra jri lơn ndrel tăch luh dak ba dih”.

            Tâm rnôk Gia Lai dôl rgum tâm nau ntuh kơl nkra ueh nâp ăp ntŭk pă têm dak tŏ nchrăp têm dak tŏ ân jŏ jong ri tâm Dak Lak, nau kan njrăng, rdâng đah trôk nar lơh dôl geh ƀư ndal bah năp ăp nau nchroh mbơh mpeh trôk nar tât ndal tâm yan mih, phŭt sial. Ntơm bôk năm tât rnôk aơ, Daklak geh 9 tŏ mih dak lip têh, sial vănh blông ndrel nglaih dah, ƀư du hê nŭih khĭt ndrel 85 ngih djơh, khuch, rnoh khuch geh nklăp 2,86 rmen prăk.

            Tât tâm yan mih, lam n’gor geh rlau 80 ntŭk rluh neh, tâm nê geh 12 ntŭk geh năl lah geh rnoh khuch ân geh rklaih ndal. Nau ngăn lah, bol ma tât tâm yan mih dak lip, nau mô tŏng dak hôm geh ăp n’gâng kan nkah mbơh yor lah ntrong n’hoch dak rnôk aơ mhe knŭng tŏng nau tŏ ân 23% rnoh neh tuch tăm, âk ngăn rnoh neh hôm e nsing tâm tơm dak hoch êng. Groi kruanh UBND n’gor Dak Lak, Nguyễn Thiên Văn, mbơh đă:

            ‘Đah ma ăp n’gâng kan, ntŭk kan, ăp n’gor geh tât ntơm bah nau nchrăp mbơh, nchrăp ƀư êng lor ăp nau kan, mbơh nau nkoch trêng kloh tât ƀon lan, nchrăp  ndoh ndơ dŏng, nŭih kan, ăp dĭng lĕ nau geh dơi dăng kan bah ăp ntŭk kan, ntơm bah rmôt kan gay ma tâm rgop nsum bah dĭng lĕ rmôt aơ tâm di nkuăl ân geh leo trong tâm ban di, geh ntrong rđau đă, rđau ƀư. Rnôk geh ăp nau tât ri ân geh ntrŭnh ƀư ngăn ân năn, n’huch ngăn nau khuch khat mpeh nau rêh kŏ kơt lah nau khuch bah drăp ndơ bah Ngih dak, bah ƀon lan”.

            Nau kan Gia Lai ntrŭt dăng nau ntuh kơl nkra ăp trong dak hoch têh, tâm rnôk Dak Lak n’hao lơn tay ăp ntrong kan njrăng, rdâng đah trôk nar ân saơ ăp nkuăl bah Tây Nguyên dôl ma ntrơn bah nau mĭn ƀư rdâng jêng nau nchrăp rdâng lor ma ăp nau tât bah ntrơn rgâl trôk nar. Ntŭk ntu trong hoch dak ndrel ma nau dăng dơi geh nchrăp mbơh, nkah lah ndrel njrăng rdâng trôk nar tât, mra lah nau dăng khlay gay nkre đăp mpăn ân ƀon kan, nkre mât nau dơi hun hao tuch tăm nâp nâl tâm rnôk bri mih trôk nar lơn ma tât khuch ndrel jêr nchroh mbơh kơt rnôk aơ./.