VOV4.M’nông:   Tâm ăp năm bah năp Tết tăm tơm si mro mrăng nkah gĭt Wa Hồ ƀa ƀơ dơi n’gor Kon Tum ƀư n’hanh dơn geh nău rƀŏng tĭng bah ăp rơh kơn nuĭh ƀon lan tâm n’gor. Năm aơ ƀư rgŏ jă Tết tăm tơm si mro mrăng nkah gĭt Wa Hồ dơi UBND n’gor ƀư di nar ntŭk ntô lam ntŭr neh 5/6 ta nkuăl têh Đăk Tô, nkuăl Đăk Tô. Ta ƀư rgŏ jă, UBND n’gor Kon Tum na nê̆ mbơh ƀư nău tăm mhe 4.500 ha bri tâm yan mih năm aơ.

          Năm aơ, tâm khay 6 mhe rlău, ta nkuăl têh Đăk Tô, nkuăl Đăk Tô, UBND n’gor Kon Tum ƀư rgŏ jă Tết tăm tơm si mro mrăng nkah gĭt Wa Hồ năm 2022 n’hanh rƀŏng tĭng Nar ntŭk ntô gŭ âm lam ntŭr neh. Jêh ƀư rgŏ jă, kruanh n’gor Kon Tum, cán bộ ăp n’gâng kan, nău kan, nsum mpôl ndrel âk nuĭh ƀon lan nkuăl Đăk Tô lĕ hăn tăm rhiăng tơm si tâm nkual Quảng trường 24/4 n’hanh du đêt ntŭk ta nkuăl têh Đăk Tô. Wa Đặng Hoàng Nam, Kruanh UBND nkuăl Đăk Tô an gĭt, tâm ăp năm dăch aơ n’gâng kan ƀon lan nkuăl uănh mĭn tât nău tăm tơm si ƀư bri gay geh ntŭk ntô uĕh n’hanh mât njrăng ntŭk ntô gŭ âm:

“Ƀư tĭng nău rƀŏng mpeh tăm bri nkŭm neh hil yôk nor nkuăl Đăk Tô lĕ tăm geh rlău 500ha n’hanh rlău 50.000 tơm si. Khay tât gay ƀư uĕh Nghị quyết 16 Đảng bộ n’gor n’hanh Nghị quyết Đại hội Đảng bộ nkuăl 17, nkuăl mbra tăm tât năm 2025 lah geh rlău 1.000ha bri n’hanh rlău 50% rnoh nkŭm jêng bri ta lam nkuăl Đăk Tô. Aơ lah nău kan bah Đảng bộ, n’gâng kan ƀon lan n’hanh nuĭh ƀon lan nkuăl Đăk Tô an nsrôih ƀư uĕh n’hanh an geh”.

N’hêl na nê̆ an saơ tâm ăp năm dăch aơ ntrong leo tăm tơm si mro mrăng nkah gĭt Wa Hồ n’hanh rƀŏng tĭng Nar ntŭk ntô lam ntŭr neh dơi ăp gưl, ăp nău kan n’hanh nuĭh ƀon lan n’gor Kon Tum rƀŏng tĭng, râng dŭt n’hâm. Nău kơl lor an nuĭh an nău tăm bri dŭt dơi uănh tât. Êng tâm rơh ƀư rgŏ jă Tết tăm tơm si mro mrăng nkah gĭt Wa Hồ n’hanh rƀŏng tĭng Nar ntŭk ntô gŭ âm lam ntŭr neh 5/6, Tơm prăk mât njrăng n’hanh hun hao bri n’gor Kon Tum lĕ njuăl prăk an N’gâng kan tuch tăm mât rong n’hanh Hun hao ƀon lan n’gor rwăt, pă rlău 157.700 tơm si bri, geh âk ntil: kơt n’gêr ônh, sưa, tơm nâng, n’ho 3 n’ha... an ăp ntŭk kan, ƀon lan. Wa Hồ Thanh Hoàng, Kruanh prăk nkrem mât njrăng n’hanh hun hao bri n’gor Kon Tum, an gĭt:

“Mpôl hên lĕ tâm pă prăk sŏk bah tơm prăk bâh ăp ntŭk nkra njêng dak kloh n’hanh ăp ntŭk nkra njêng công nghiệp geh dŏng bah tu dak đah rnoh prăk lah 650 rkeh prăk tâm ôp tâm nchră đah UBND n’gor pă an N’gâng kan tuch tăm mât rong n’hanh Hun hao ƀon lan rwăt tơm ntil. Yor đah nău ŭch bah lĕ trong chính trị, dơi âk Nuĭh ƀon lan ŭch kơl n’gor Kon Tum mbra tăm bri lôch uĕh”.

Tâm yan mih năm aơ, n’gor Kon Tum lĕ rƀŏng tăm mhe 4.500 ha bri. Jêh rnôk UBND n’gor jao rnoh tăm, 10 nkuăl, nkual ƀon têh tâm n’gor n’hanh ăp ntŭk kan tơm bri lĕ ndâk ƀư trong nchrăp mbơh ƀư tĭng nău kan. Du đêt ntŭk dăn tăm bri rlău rnoh n’gluh an, kơt nkuăl Đăk Hà dăn tăm mhe 450 ha bri rlău 152 ha nkôp đah trong nchrăp jao an; nkual ƀon têh Kon Tum dăn tăm 500 ha rlău 302 ha nkôp đah trong nchrăp jao an... Wa Võ Sỹ Chung, Chi cục trưởng Chi Cục kiểm lâm n’gor Kon Tum an gĭt, ndrel đah nău nsrôih ƀư ntĭm kỹ thuật, săch tơm ntil tâm di gay tăm bri, ntŭk kan ntrôl dăng trong kan mât uănh njrăng uĕh rnoh neh bri geh aƀaơ kơt rnoh neh bri tăm mhe:

“Ta lam n’gor aƀaơ mpôl hên dôl hăn tăm đah ăp gưl, ăp nău kan bah ăp nkuăl, nkual ƀon têh ƀư uĕh trong kan mât uănh bri. Geh trong mât uănh uĕh rnoh neh bri geh aƀaơ n’hanh mbra hun hao tăm bri âk tay lơn”.

Lam n’gor Kon Tum aƀaơ geh rlău 780.000 ha bri n’hanh neh bri tăm geh bơi 80% rnoh neh bri hon êng lam n’gor. Tâm năm 2021 mhe rlău ăp ntŭk n’hanh ntŭk kan tơm bri tâm n’gor lĕ tăm mhe geh rlău 4.800 ha bri n’hanh rlău 701.000 tơm tăm chah chrai rlău nău nchrăp n’gluh an. Nău uĕh têh ngăn ma bri nsĭt tay an nău rêh, tâm nĕ geh săk rnglăy bah nău ƀư kơl trok nkhôm ntŭk ntô bri dôl ntrôl tay an nău tăm bri n’hanh mât bri ta n’gor Kon Tum.

Nuĭh rlang: Y Sưng Phê Ja