Bar hê nuĭh leo kan lĕ mpơl nău ŭch tâm let năp tay, nsrôih tay ndơ̆ nău tâm boh kan ndrel lĕ rngôch Việt Nam- Hàn Quốc hun hao têh dăng tay lơn. Bar ding tâm ban ŭch n’hao nău tâm mbơh kan, tâm mâp kan gâl têh, ntrôl dăng tâm kơl rnă njrăng ngih dak, rnă njrăng đăp mpăn, ntrôl tâm kơl wăng sa, tăch rgâl, doh rklaih ăp nău kŏ văk, nta nău dơh nơih an drăp ndơ lăp ta ntŭk tăch rgâl 2 dak, tâm ban kơt tâm kơl ta ăp trong kan mhe, geh âk nău dơi kơt khoa học công nghệ, rgâl mhe nău mĭn kan, mĭn uănh n’hanh hun hao. Thủ tướng Chính phủ Phạm Minh Chính lah na nê̆ Việt Nam mbra geh nta tay nău dơh nơih an ăp nuĭh ntuh kơl Hàn Quốc pah kan jŏ jong ta Việt Nam, đă Hàn Quốc an geh pơk hvi tay ntŭk tăch rgâl an drăp ndơ Việt Nam, ngăn lah ndơ tuch tăm, rvăt nglăp ndơ ta ntŭk tăch rgâl Hàn Quốc, pă ăp rnoh manh an lor an Việt Nam gay ma mbơh tơih ăp nău kan têh khlăy, geh nău ntĭt têh kơt trong loih, trong hăn ta neh têh ngăch.