Lơ 14/12, ta Brussel, dak Bỉ, Thủ tướng Chính phủ Phạm Minh Chính hŏ ndrel ma rđau kan ASEAN ndrel EU râng rơh rƀŭn gưl prêh di nkah 45 năm nar tâm boh ASEAN-EU. Bah 45 năm, nau tâm boh ASEAN-EU geh hun hao ueh, geh âk nau dơi. Năm 2021, ASEAN lah dak tâm boh nau kan nsum bah dih Châu Âu têh tal 3 bah EU tâm rnôk EU lah dak kan nsum ƀư nau kan tăch rgâl têh ngăn tal 3 bah ASEAN đah rnoh ƀư nau kan tăch rgâl bar ding geh 268,9 rmen đôlar, nkre lah EU lah ntŭk ntuh kơl tă bah dak ba dih tal 2 bah ASEAN đah rnoh tơm prăk geh 26,5 rmen đôla.

Rƀŏng tât ăp năm ba kơi, bar ding mra tâm ban nau gay ma ƀư jru nâp lơn tay nau tâm boh kan nsum geh ndâk tâm nkuăl 2020 tâm nau ntô̆ n’hao lơn tay luật pháp lam ntur neh, tâm boh tâm ban ndrel geh săk rnglay, ntrŭt dăng nau ndâk văng sa, hun hao ndrih ndrel nâp nâl. Thủ tướng Chính phủ Phạm Minh Chính ntô̆ n’hao nau tâm boh khlay bah nau tâm nchră gưl prêh di nkah rnôk aơ, nkah tât 45 năm nar tâm boh bar ntŭk kan tâm nkuăl geh nau dơi lam ntur neh. Thủ tướng lah rjăp ăp nau tă dơi bah nau tâm nchră, ndrel dôl ntop tay nau dơi hun hao tâm boh./.