VOV4.M’nông- Ôi nar 24/7, tâm bôk nău tât khâl n’hanh pah kan ta Nghệ An, Thủ tướng Chính phủ Phạm Minh chính n’hanh mpôlpah kan tât khâl, pah kan đah n’gâng kan Tư lệnh Quân khu 4. Ntoh ngơi ta aơ, Thủ tướng Phạm Minh Chính lah na nê̆, “Mô geh du quân khu ma geh âk môch kơt quân khu 4, geh âk nuĭh bĭch nkre lah nkual neh Quân khu 4.

Thủ tuớng pah kan ta quân khu 4

Quân khu 4 an geh ƀư ueh lơn nău kan tâm pêt tâm kơl, nta nău nơih lơn an ƀon lan, đồng chí lam dak ƀư tĭng ăp nău kan lah ueh nuĭh geh kan, nuĭh rvnăl vâl tahen khĭt, rnăk vâl tahen dơi kơl, tât khâl ăp môch, mpoh nhang, kahgĭt ăp nuĭh khĭt tâm lơh”. Ta 2 rơh tâm lơh mprơh Pháp, Mỹ n’hanh mât neh dak, ta quân khu geh 198.659 tahen khĭt, 113.597 tahen sôt rmanh, 12.316 nuĭh mê̆ Việt Nam anh hùng, 51.286 nuĭh geh nău khuch tât bâh dak si khih đioxin.

Kêng măng 24/7, Thủ tướng Chính phủ Phạm Minh Chính pah kan đah Ban Thường vụ N’gor ủy Nghệ An mpeh mbơh ƀư, săk rnglăy ƀư tĭng Nghị quyết Đại hội 13 bah Đảng n’hanh Nghị quyết Đại hội Đảng bộ n’gor rơh tal 14, năm kan 2020-2025. Tĭng nău mbơh bah n’gor ủy Nghệ An, 6 khay bôk năm 2022, Dĭng lĕ ndơ ta n’gor hao 8,44% (dâk tal 2 nkual Bắc Trung bộ, dâk tal 18/63 n’gor, nkual ƀon têh mpeh tâm Trung ương). 

Thủ tướng pah kan ta Nghệ An

Nkual geh trong rdâk hao dăng, kơp êng hao 9,22%. Ta nar pah kan, kruanh n’gor Nghệ An lĕ nkoch dăn đă đah Chính phủ, Thủ tướng Chính phủ mpeh nău nkra rgâl tĭng ntŭk dăp rgum tach ndeh par quốc tế Vinh gay n’hao âk mpăr tât năm 2030 bah 8 rkeh hao 12 rkeh năch/du năm; dăn đă joi trong mkra tơm prăk gay ƀư trong cáo tốc Viêng Chăn-Hà Nội; dăn đă Thủ tướng chính phủ n’hanh ăp n’gâng kan, nău kan TW uănh mĭn ntop kơl prăk sŏk neh nău nchrăp ƀư nkra, pơk hvi quốc lộ 1, lvang hăn n’gor Nghệ An... jêh djăt nău rgop ntoh ngơi tâm nchră, ntoh ngơi ta nar pah kan, Thủ tướng Chính phủ Phạm Minh Chính nkoch kloh, n’gor an kơp uănh tay ăp nău nchrăp ƀư yor tơm prăk đêt, an săch nău khlay, tâm ban, pah kan lôch jêh nău kan nĕ. Wăch rgum ntuh kơl geh âk nău rgâl mhe, yơn mô hŏ geh âk, mô geh ăp doanh nghiệp têh ntuh kơl an ta aơ... Năm tât, Nghệ An an ntrôl ntuh kơl rgâl mhe, uănh trong kan têh hvi, joi lĕ nău geh êng, nău geh têh, dơh an tâm rlong, rgŏ jă ăp tơm prăk tâm di bah kon nuĭh, nuĭh ƀon lan gay hun hao.

Nuĭh rblang: Thị Đoắt