Ôi 19/3, Thủ tướng Phạm Minh Chính ƀư tơm rơh hop Chính phủ way nkô̆ mpeh rdâk njêng pháp luật khay 3/2025 gay tâm nchră n’hanh an nău rgop đah 6 trong nchrăp luật, dăn đă rdâk njêng luật.

Ta rơh hop, ăp nuĭh kan tâm Chính phủ hŏ tâm ôp, tâm nchră rgum tâm  ăp nkô̆ nău khlay, hôm geh nău êng êng dăn nău rgop bah Chính phủ mpeh: Luật Năng lượng nguyên tử (rgâl nkra); Luật Pă an dak; Luật mât uănh, hun hao đô thị; Luật Khoa học công nghệ n’hanh rgâl blău ƀư njêng mhe; Luật dŏng ŭnh nar mpêt nkrem, săk tam; n’hanh dăn đă rdâk njêng Luật Doanh nghiệp (rgâl nkra). Lah ta rơh hop, Thủ tướng Phạm Minh Chính nchŏng kloh: ntuh kơl wat jêh, rdâk njêng pháp luật lah ntuh kơl an hun hao; ƀư jăp pah kan rdâk njêng pháp luật mbra nta trong dơh an hun hao. Thủ tướng đă nău rdâk njêng ăp siƀŭt pháp luật ân rgum nău gĭt blău, ntik n’hao nuih  n’hâm dơn kan âk, ăp siƀŭt ân glêh tam, kloh nkô̆, dơh wât, dơh kơt dŏng, dơh ƀư, dơh uănh năl, dơh ôp uănh, groi nđôi, ân ƀư ngăch, nkre ƀư, nkre rhuăt luh nău tă ơm gĭt kan, ƀư wat jêh.