Kêng măng 11/10, ndeh păr rdeng êng Thủ tướng Chính phủ Phạm Minh Chính ndrel mpôl ntơh măt gưl têh Việt Nam râng tâm nchră gưl têh ASEAN tâl 44, 45 n’hanh ăp tâm nchră gưl têh geh tât ta Viêng-chăn, Lào, ntơm  bah nar 08 tât 11/10/2024  hŏ sĭt dak nơm, dŭt jêh uĕh lăng hăn pah kan. Tâm 4 nar tâm nchră geh bơi 20 nău kan, rlău 30 Kruanh rđău kan ăp ASEAN n’hanh băl tâm boh tât râng, nklăp 90 siƀŭt nchrăp lor dăn đă dơi uănh an dŏng n’hanh nchih nkah.

Đah mông nar pah kan dăp rduăl, mô gŭ rlu tâm 4 nar, Thủ tướng Chính phủ n’hanh ăp nuĭh tâm mpôl hăn hŏ râng rlău 60 nău kan lĕ ma bar ding n’hanh âk ding, lah rjăp rup gui lor nchrăp, nsrôih uĕh n’hanh nău dơn kan bah Việt Nam, nkre rgop ntrŭt ntrôl tâm boh bah Việt Nam đah ăp băl tâm boh. Tâm nchră gưl têh ASEAN tâl 44, 45 n’hanh ăp Tâm nchră geh tât hŏ geh nău dơi uĕh lăng, mpôch dŭt tay năm ƀư kruanh ASEAN 2024 bah Lào. Thủ tướng Phạm Minh Chính hŏ geh ăp rơh mâp đah Thủ tướng Lào n’hanh Thủ tướng Campuchia, ndrel lah rjăp nău way ơm n’hanh rnoh khlay bah nuih n’hâm tâm rnglăp Việt Nam-Lào-Campuchia; tâm ban ŭch kan nsum tay n’hao tâm boh pe dak nar lơn ma ngăn ngăn n’hanh nsĭt geh nău dơi, tŏng đah nău ŭch geh ngăn ngăn bah pe dak n’hanh tâm di đah nău ŭch geh hun hao tâm rơh mhe.