VOV4.M’nông- Di rơh kahgĭt 60 năm nar way ơm mpôl kan cảnh sát nhân dân n’hanh vơt dơn Huân chương Hồ Chí Minh geh ƀư ta măng nar 17/7 ta Hà Nội, Thủ tướng Chính phủ Phạm Minh Chính njoăl nău rhơn ueh tât lĕ rngôch ăp tướng lĩnh n’hanh lĕ rngôch cán bộ, tahen mpôl kan công an nhân dân, cảnh sát nhân dân Việt Nam ăp nuĭh nchih tay ăp nău mprơ khlăy bâh rơh mhe.

Ntoh ngơi ta rơh lễ, Thủ tướng chính phủ Phạm Minh Chính lah na nê̆ tâm rnôk rdâk njêng, tâm lơh n’hanh têh kuăng, cảnh sát nhân dân Việt Nam lĕ mpơl na nê̆, jăp ngăn nău kan đah Đảng, ngih dak, đah neh dak n’hanh ƀon lan, đah nău kan xã hội chủ nghĩa. Tâm let năp tay, nău ta lam ntur neh n’hanh ta nkual geh ăp rơh nkhêp ueh, dơh nơih n’hanh jêr jŏt, geh âk nău ntul rlong. Đah nău kan tơm khlăy, Thủ tướng đă, mpôl kan cảnh sát nhân dân an geh gĭt na nê̆ nău mhe, nsrôih rgâl mhe nău mĭn kan, pah kan, njêng soan dăng rgum lĕ rngôch, ndâk nsơm ăp nău mô hŏ dơi, nău kŏ văk n’hanh ƀư tĭng ueh ăp trong kan, nău kan tơm khlăy ma Thủ tướng nkah mbơh.

Nuĭh rblang: Thị Đoắt