Ntoh ngơi ta rơh tâm nchră, Thủ tướng Chính phủ Phạm Minh Chính kuăl đă ăp dak an geh nău nsrôih mpeh chính trị âk lơn, rnoh kan âk lơn, pah kan răng dăng lơn tay an ăp bôk nău kan, ăp nău nchrăp kan na nê̆, ngăn ngên, săk rnglăy lơn. Yor lah jut jăng ach o mô dơn geh nău khlăy ngăn, ma hôm nha lah ngoăy tâm âk nău tơm nsan khlăy ngăn đŏng, geh gŏ kan sŏng dăng mât đăp mpăn, ueh lăng, rnă njrăng, đăp mpăn ta lam ntur neh. Di rơh aơ, Thủ tướng Chính phủ Phạm Minh Chính lĕ mbơh tơih na nê̆ nău dơi bâh Việt Nam du nău kan leo lor ueh geh nău dơi tâm jut jăng ach o. Bâh du dak ach o, rluk mâl, geh nău khuch khat roh jot âk lôch bơi tât 40 năm tâm lơh tâm su, 30 năm geh nchueng rvêl mô an tâm nđur, tăch rgâl đah ăp dak, đah trong rgâl mhe, Việt Nam lĕ dơi geh nkô̆ mpŏng n’huch ach o âk ding, hăn ndrel đah ndâk nsơm nău mô geh mô dơi mpeh dak si, ntĭm nti, ngih jay gŭ, dak kloh, ntŭk gŭ rêh. Bâh nĕ Việt Nam lĕ sĭt ơm tâm 10 năm ƀư tĭng ăp nkô̆ mpŏng hun hao ăp rach năm bâh LHQ.