VOV4.M’nông - Lôch rnôk Cục dự trữ liên bang Mỹ n’hao rnoh prăk kon tay 0,75 điểm gâl rhiăng ta măng nar naơ n’hanh ăp ngân hàng trung ương châu âu n’hanh âk dak êng lĕ âk tơ̆ n’hao rnoh prăk kon gay ma tâm rdâng đah lạm phát hao dăng dăch aơ, ôi nar 28/7, Thủ tướng Phạm Minh Chính leo rơh rƀŭn nchră đah du đê̆ kruanh n’gâng kan n’hanh nuĭh leo kan ăp n’gâng kan, ntŭk kan rgum tâm nchră ăp trong kan, nău kơl an an tâm di đah lam dak năp lor n’hanh jŏ jong gay ma geh mât njrăng bah lạm phát, đăp mpăn nău wăng sa têh kuăng n’hanh ntrôl dâk nsơm, hun hao wăng sa rêh jêng. Thủ tướng nkah đă, n’gâng kan wăng sa dak he geh nău pơk hvi, nău kan mô nă âk, nău dơi tâm rdâng mô nă geh, jêng lah an geh nău rgâl jê̆ bâh bah dih mbra dơi geh nău tât têh kuăng tâm dak nơm. Ta năp nău nĕ, Thủ tướng đă ăp n’gâng kan, ntŭk kan an geh rgum uănh nđôi na nê̆, gĭt na nê̆ nkô̆ nău, mô dơi mô geh nău njrăng, n’hao nău dơi kan, mbơh rblang, leo kan geh nău mât kơl ngăch n’hanh mbơh rblang an tâm di, ngăch ndăn, tâm di, khoa học n’hanh săk rnglăy năp lor n’hanh jŏ jong.

Nuĭh rblang: Thị Đoắt